ՍԴ նախագահի լիազորությունները դադարեցնելու գործընթացն իրավական հիմք չունի. իրավաբանը՝ «Իմ քայլի» նախագծի մասին

Ազգային ժողովը, որպես քաղաքական մարմին, պետք է իրավական, մասնագիտական հիմք ունենա  գործընթաց նախաձեռնելու համար: Այս գործընթացի իրավական հիմքը, այն էլ՝ լիազորությունների դադարեցման համար, առկա չէ: Այս մասին Yerkir.am-ին ասաց իրավաբան Արամ Վարդևանյանը՝ անդրադառնալով  ԱԺ «Իմ քայլը» խմբակցության նախաձեռնած՝  ՍԴ նախագահ  Հրայր Թովմասյանի լրազորությունները դադարեցնելու նախագծին:

Խնդրին արձագանքելով որպես իրավաբան՝   Վարդևանյանը  չցանկացավ մեկնաբանել ՍԴ նախագահ Հրայր Թովմասյանի հայտարարությունը, որում նա իր դեմ սկսված գործընթացը քաղաքական և սուբյեկտիվ էր համարել և, որպես ապացույց, նշել վարչապետի՝ դատարանների մուտքերն արգելափակելու կոչը, դատավոր Վահե  Գրիգորյանի «ինքնահռչակումը»  որպես ՍԴ նախագահ և իր անվան անհիմն վկայակոչումները:

Մեր զրուցակիցը նշեց՝  խոսել ՍԴ նախագահի կարգապահական խախտման մասին հնարավոր չէ, քանի որ կարգապահական խախտումը, էական կարգապահական խախտումը Սահմանադրական դատարանի մասին օրենքում նախատեսված հիմքերի դեպքում են: Այսինքն՝ սա ոչ թե գնահատողական դատողության, այլ իրավական գործընթաց պետք է լինի:

«Սահմանադրական դատարան առաջին դիմումը, որը հունվար ամսին ես եմ ներկայացել, վերաբերում էր Վճռաբեկ դատարանի կողմից սահմանադրական նորմերի մեկնաբանման հարցին: ՍԴ-ն նշված դիմումը մերժեց ընդունել աշխատակարգային որոշման վարույթ, թեև շատ կարևոր իրավական դիրքորոշում տվեց, բայց եկեք փաստն արձանագրենք՝ ՍԴ-ն այն նույն կազմով, որով որոշումներ է կայացրել սեպտեմբերի 4-ին, դեռևս հունվարին որոշում էր կայացրել: Մեկ հետաքրքիր հանգամանք՝  այդ որոշմանը բազմաթիվ անգամներ հղում էր տվել նաև գլխավոր դատախազությունը: Հրայր Թովմասյանի գործունեության և այլնի մասին որևէ քննադատություն այդ ժամանակ նկատե՞լ էիք, կարծում եմ՝  ոչ»,- ասաց Վարդևանյանը:

Ինչ վերաբերում է նախկինում քաղաքական գործունեությամբ զբաղվելուն, իրավաբանը հայտնեց, որ Սահմանադրությունը ՍԴ դատավոր ընտրված անձին թույլ է տալիս, որ նա նախկինում քաղաքական գործունեությումբ զբաղված լինի, հետևաբար՝ հակառակը պնդել չենք կարող:

«Քավոր-սանիկական հարաբերություններ՝ ինչի՞ մասին է խոսքը: ՍԴ-ում Օրբելյան Արամը դատավարության կողմ երբեք չի եղել, որպես դիմող կողմի ներկայացուցիչ՝ դատավարության կողմ եղել եմ ես: Ամբողջ փաստաթղթաշրջանառությունը՝ գրությունները, բացատրությունները, առարկությունները, ես եմ ներկայացրել»,- ասաց Վարդևանյանը՝  անդրադառնալով քննարկումներին, որ, Արամ Օրբելյանի բարեկամը լինելով, Հրայր Թովմասյանը չի կարող Քոչարյանի գործով արդար որոշում կայացնել:

Հարցին, թե իշխանությունների տարանջատման սկզբունքը ԱԺ-ին թո՞ւյլ է տալիս ասել, որ ՍԴ-ն սխալ որոշում է կայացրել, նա արձագանքեց. «Սահմանադրական դատարանը սխալ որոշում չի կարող կայացնել: Ենթադրում եմ՝ դա քաղաքական հայտարարություն է, որն իրավական տիրույթում մեկնաբանելը անշնորհակալ գործ է: ՍԴ-ի որոշումները կոլեգիալ կազմով են ընդունվում՝ ձայների մեծամասնությամբ, և իրենցից ենթադրում են Սահմանադրության մեկնաբանություն»: 

Հիշեցնենք, որ այսօր ԱԺ-ն քննարկում էր Հրայր Թովմասյանի լիազորությունները դադարեցնելու համար ՍԴ դիմելու հարցը, իսկ վերջնական որշումը ՍԴ-ն կկայացնի:

Այս կապակցությամբ Վարդևանյանը հույս հայտնեց, որ բացասական որոշման դեպքում ՍԴ դատավորների վրա ճնշումներ գործադրելու  դեպքերից զերծ կմնանք, քանի որ դա իրավական և ժողովրդավարական պետությանը հարիր չէ:

Ի դեպ, «Իմ քայլը»-ի պատգամավոր Սուրեն Գրիգորյանը, որ ԱԺ-ում հարցի հիմնական զեկուցողն էր, իր ելույթում նշել է՝  հիմնավոր կասկածներ կան, որ Թովմասյանը կարող էր անաչառ, անկողմնակալ չլինել: «Կարգապահական խախտում կա, սակայն վերջնական որոշողը ՍԴ-ն է: Եթե նա ասի, որ կարգապահական խախտում կա կամ չկա, երկու դեպքում էլ պետք է հիմնավորում տա»,- ասել է պատգամավորը: