Մենք Արցախի լավ դեսպաններն ենք ոչ միայն Կիպրոսում, այլեւ նրա սահմաններից դուրս

Սեպտեմբերի 28-ին Ստեփանակերտում կայացել է Կիպրոսի Սթրովոլոս քաղաքը ներկայացնող պատվիրակության մամուլի ասուլիսը: Արցախի լրագրողների հետ հանդիպման ընթացքում ՀՅԴ Կիպրոսի Հայ դատի հանձնախմբի և ՀՅԴ Եվրոպայի Հայ դատի գրասենյակի նախաձեռնությամբ Արցախ այցելած պատվիրակության ղեկավար, քաղաքապետ Անդրեաս Պապախարալամպուսը ամփոփել է այցի արդյունքները:

Քաղաքապետը նախ շնորհակալություն է հայտնել ՀՅԴ Հայ Դատի գրասենյակներին և ՀՅԴ կուսակցությանը՝ այցը կազմակերպելու համար և նշել, որ տպավորված է Արցախ այցելությամբ և արցախցիների հյուրընկալությամբ: «Մենք այստեղ ենք մեր ժողովրդի և Արցախի ժողովրդի հետ կապեր ստեղծելու համար: Մեր բոլոր հանդիպումները արդյունավետ էին, խոսել ենք մշակույթի, սպորտի, գիտության ոլորտում համագործակցության մասին: Մենք մեկնում ենք ամենալավ տպավորություններով և ուզում ենք հավաստիացնել, որ մեր սրտերը միշտ բաց են Արցախի ժողովրդի համար»,- իր խոսքում ասել է Անդրեաս Պապախարալամպուսը՝ հավաստիացնելով, որ իրենք Արցախի լավ դեսպաններն են ոչ միայն Կիպրոսում, այլ նրա սահմաններից դուրս:

Եվրոպայի Հայ դատի գրասենյակի նախագահ Գասպար Կարապետյանն իր խոսքում վստահեցրել է, որ շարունակելու են ՀՅԴ գրասենյակների կատարած աշխատանքը՝ զորավիգ լինելով Արցախը մեկուսացումից բերելուն:

Հիշեցնենք, որ քաղաքապետ  Անդրեաս Պապախարալամպուսի գլխավորած պատվիրակության կազմում են քաղաքային խորհրդի անդամներ Աննա Կարիդին, Իրինի Վիոլարին, Մարիոս Հաջիվասիլուն, Մարիոս Անդրեուն և Պանայոտիս Մանոլին:

Պատվիրակությանն ուղեկցում են ՀՅԴ Կիպրոսի Հայ դատի հանձնախմբի նախագահ Հակոբ Գազանճյանը, Կիպրոսի ՀՅԴ կոմիտեի անդամ Րաֆֆի Մահտեսյանը և Եվրոպայի Հայ դատի գրասենյակի նախագահ Գասպար Կարապետյանը: