Վանեցյանը հեռացվել է վարչապետի որոշմամբ. ԱԽ քարտուղար

Այսօր՝ կառավարության նիստից հետո, լրագրողները անվտանգության խորհրդի քարտուղար Արմեն Գրիգորյանից հետաքրքրվեցին՝ տեղյա՞կ է ԱԱԾ նախկին պետ Արթուր Վանեցյանի հրաժարականի պատճառների մասին:

ԱԱԽ քարտուղարը պատասխանեց, որ նշանակովի պաշտոններում հրաժարական չի լինում: «Ազատման դիմում կարող է լինել. այս հարցն այս տրամաբանության մեջ պետք է դիտարկել։ Բնականաբար, նա հեռացել է վարչապետի որոշմամբ, քանի որ վարչապետն է այդ պաշտոններում նշանակումներ կատարում»,- պարզաբանեց Գրիգորյանը:

Ինչ վերաբերում է Վանեցյանի հրաժարականի պատճառներին, Արմեն Գրիգորյանն ասաց, որ վարչապետն այդ մասին արդեն հնարավորինս բաց խոսել է: «Գոհ չի եղել աշխատանքից, բնականաբար, որոշում է կայացրել: Այո, որոշումն ամբողջությամբ գտնվում է վարչապետի որոշման տիրույթում»,- նշեց ԱԱԽ քարտուղարը։

Անդրադառնալով վարչապետի այն արտահայտությանը, թե Վանեցյանը, այդպիսի հայտարարություն անելով, ուսադիրները գցել է աղբամանը, Արմեն Գրիգորյանն ասաց. «Վարչապետն ինչ ասել է՝ ամբողջովին համապատասխանում է իրականությանը։ Այս առումով՝ մի շատ կարեւոր բան էլ ֆիքսեմ, որ այսօր քննարկվում է՝ վարչապետը գերագույն գլխավոր հրամանատա՞ր է, թե՞ ոչ։ Սահմանադրական փոփոխություններից հետո Սահմանադրության մեջ նշվել է, որ գերագույն գլխավոր հրամանատար է պատերազմի ժամանակ։ Հիմա կարող եմ հարցադրում անել՝ ՀՀ-ն այսօր պատերազմի մե՞ջ է, թե՞ ոչ»։