ՏԵՍԱՆՅՈՒԹ. Առաջին երեխայի ծննդյան նպաստը 6 անգամ բարձրացնելը չի խթանի ծնունդները. տնտեսագետ

Արդեն ապացուցվել է, որ նման ծրագրերը մեր երկրում արդունավետ չեն. Yerkir.am-ի հետ զրույցում ասաց  տնտեսագետ, ՀՅԴ Բյուրոյի տնտեսական հետազոտությունների գրասենյակի ծրագրերի համակարգող Թադևոս Ավետիսյանը՝ անդրադառնալով կառավարության ներկայացրած ծրագրին, որով նախատեսվում է 2020 թվականից  6 անգամ բարձրացնել առաջին երեխայի ծննդյան միանվագ նպաստը՝ 50 հազար դրամից 300 հազար դրամ դարձնելով:

Տնտեսագետը հավաստում է՝  միջազգային փորձը ևս վկայում է, որ  միանվագ նպաստները չեն կարող էական և կայուն ազդեցություն ունենալ ծնունդների աճի վրա, մանավանդ, որ այդ բարձրացված չափը խթան հանդիսանալու համար այնքան էլ մեծ չէ:

«Համոզված եմ՝ կառավարության նիստում այս ծրագիրը կներկայացվի որպես ժողավրդագրական աճին միտված նախաձեռնություն, սակայն օրվա իշխանությունները պարտադիր պետք է անդրադառնան հետևյալ  հարցերին՝ առաջին՝  կատարվե՞լ է ազդեցության գնահատում, արդյո՞ք այդ փոփոխությունն  այն այլընտրանքն է, որն ամենարդյունավետ կերպով  կխթանի ծնունդները,  երկրորդ՝  արդյո՞ք  այդ 300 հազար դրամն այն չափն է,  որը երիտասարդներին  կօգնի  չհետաձգել  իրենց առաջին երեխայի ծնունդը»,- ասաց Թադևոս Ավետիսյանը:

Տնտեսագետը նշեց, որ հատկացվող  6 մլրդ դրամի նպատակային ծախսումը կախված է այս հարցերի  պատասխաններից ՝  հաշվի առնելով այն, որ 2-րդ երեխայի ծնունդի նպաստի՝ անցած տարվա բարձրացումը որևէ  էական ազդեցություն չունեցավ:

Առավել մանրամասն՝ տեսանյութում: