«Տաթեւ» Ծրագիրը Ամբողջացուց 33րդ Տարեշրջանը

ՆԻՒ ԵՈՐՔ.- Միացեալ Նահանգներու արեւելեան թեմի Ազգային առաջնորդարանի «Ս. Գրիգոր Տաթեւացի» ամառնային ծրագիրը ամբողջացուց իր 33րդ տարեշրջանը St. Mary of Providence կեդրոնին մէջ (Էլվըրսըն, Փենսիլվենիա): 30 Յունիսէն մինչեւ 7 Յուլիս, ծրագիրին մասնակցեցան քառասուն աշակերտներ՝ 12 ծուխերէ եւ 16 հոգեւորական ու աշխարհական դասատուներ եւ օգնականներ:

Առաջնորդարանի Քրիստոնէական դաստիարակութեան բաժինին հովանաւորութեամբ, ծրագիրը կը հրամցնէ առանձնայատուկ քրիստոնէական դաստիարակութեան յայտագիր՝ 13-18 տարեկան պատանիներու, երրեակ նպատակով. քրիստոնէական դաստիարակութիւն, աղօթք ու պաշտամունք եւ ընկերական գործունէութիւն: Ծրագիրին վարիչն էր առաջնորդական փոխանորդ եւ Ռիճֆիլտի (Նիւ Ճըրզի) Սրբոց Վարդանանց եկեղեցւոյ հոգեւոր հովիւ Սահակ Ծ. վրդ. Եմիշեան: Այս տարի, երեք աշակերտներ շրջանաւարտ եղան «Տաթեւ» ծրագիրէն, ամբողջացուցած ըլլալով քառամեայ ծրագիրը, իւրաքանչիւր ամառ մէկ շաբաթ: Շրջանաւարտներն են՝ Փիթըր Յակոբեան (Ս. Սարգիս եկեղեցի, Տակլըսթըն, Նիւ Եորք), Լիաննա Իսախանեան (Ս. Վարդանանց եկեղեցի, Ռիճֆիլտ, Նիւ Ճըրզի) եւ Կարօ Մինասեան (Ս. Խաչ եկեղեցի, Թրոյ, Նիւ Եորք):