Մի շարք հանցանքների մեջ մեղադրվող Աթամբաևը մեկնում է Մոսկվա

Ղրղզստանի նախկին նախագահ Ալմազբեկ Աթամբաևը հայտնել է, որ մեկնում է Ռուսաստան Կանտեի ավիաբազայից: Նրա խոսքով` ինքը կվերադառնա հուլիսի 25-ին. հայտնում է Minval.az-ը:

Նշվում է, որ նրա տան մոտ ներկայումս հավաքվել են նրա կողմնակիցները:

Աթամբաևը նախկինում երեք անգամ չի ներկայացել երկրի ՆԳՆ` հարցաքննության, այն բանից հետո, երբ նրան հունիսի 27-ին զրկեցին անձեռնմխելիությունից:

Ըստ տեղական ԶԼՄ-ների` Աթամբաևի քաղաքական հետապնդումը տեղի է ունենում ներկայիս նախագահ Սոորոնբայ Ժեենբեկովի հետ նրա վեճի ֆոնին: Ավելի վաղ հատուկ պատգամավորական հանձաժողովը նրա դեմ 6 մեղադրանք էր ներկայացրել:

Խորհրդարանականների վարկածով՝ Աթամբաևը մեղավոր է Բիշքեկի ջերմաէլեկտրակայանի արդիականացման ժամանակ կոռուպցիայի, հողատարածքների ապօրինի վերափոխման և մի շարք այլ ապօրինի գործողությունների մեջ: