Այն, ինչ մեզ մոտ եղավ, մազից պրծնելն էր, բառի բուն իմաստով. ՀԱԷԿ նախկին գլխավոր տնօրեն

Նման վթարներ, ինչպիսին հուլիսի 10-ի տեղի ունեցավ,  ցավոք, շատ եմ տեսել.  այսօր լրագողների հետ զրույցում ասաց «Հայէներգո»-ի նախկին գլխավոր տնօրեն Սպարտակ Հակոբյանը` օրինակ բերելով,  մասնավորապես, 2013 թվականին նոյեմբերի 2-ին տեղի ունեցած վթարը:

«Էլի շատ ծանր վթար էր: Սկսվել էր Իրանում, տարածվել Հայաստանի վրա և խորացել. Հայաստանի սպառիչների 90%-ն անջատվել էր, մնացել էր ընդամենը Սյունիքը, որովհետև մնացել էր կապված Իրանի հետ: Ցավոք, անելիքների մոտ 90%-ը չի արված, այն, ինչ առաջարկված է, մշակված, կիրառված է կիսատ-պռատ:  Չեմ ուզում ինչ-որ սև պիտակներ կպցնել, բայց չպետք է մոռանանք, որ համակարգը կենդանի օրգանիզմ է»,- նշեց նա` շեշտադրելով, որ ինչ էլ կատարվի Իրանի կամ հարևան այլ համակարգերում, Հայաստանի էներգահամակարգի հուսալիությունը պետք է մնա վստահելի ապահովված: «Դա իմ հորինած բանը չէ, ստանդարտներ կան Եվրոպայում և Ամերիկայում»,- ընդգծեց Հակոբյանը:

Ըստ ՀԱԷԿ նախկին գլխավոր տնօրեն Սուրեն Ազատյանի` համակարգը միայն կենդանի օրգանիզմ համարելը սխալ է: «Էներգահամակարգը քիչ է ասել, որ միայն օրգանիզմ է: Չկա կարևոր կամ երկրորդական բան: Վթար կարող է առաջանալ, եթե ինչ-որ տեղ մի կաբել խփեց, անջատիչը չանջատեց, և սա կարող է զարգացում ունենալա: Այն, ինչ մեզ մոտ եղավ, մազից պրծնել էր, բառի բուն իմաստով»,- կարծիք հայտնեց նա:

Մասնագետները, սակայն, նշեցին նաև, որ ինչպես ինքնաթիռում, այնպես էլ այս պարագայում գոյություն ունեն սև արկղեր, որոնք համապարփակ ուսումնասիրության ենթարկելուց հետո միան կկարողանան  ասել, թե որոնք են եղել վթարի հիմնական պատճառները: «Մինչ այդ անիմաստ է խոսել պատճառների մասին: Այստեղ ենթադրություններով պետք չէ խոսել»,- նշեց Սպարտակ Հակոբյանը ` միևնույն ժամանակ շեշտելով, որ հենց այդ ժամանակ ինքը կառաջարկի կանխարգելիչ միջոցառումներ:

Հիշեցնենք, որ հուլիսի 10-ին էներգետիկ համակարգում տեղի էր ունեցել վթար, անջատվել էին Երևան ՋԵԿ-ը և Հրազդանի ՋԷԿ-ի 5-րդ բլոկը: