Թուրքիայում գործող մոտ 15․000 ընկերության բաժնետերերը սիրիացիներ են

2019թ․ փետրվարի դրությամբ Թուրքիայում գործում է 15․159 ընկերություն, որոնց առնվազն 1 բաժնետերը Սիրիայի քաղաքացի է։ Այդ ընկերությունների մեծ մասը գտնվում է Ստամբուլում, Գազիանթեփում, Մերսինում, Հաթայում, Բուրսայում։ Դրանք հիմնականում մեծածախ և մանրածախ առևտրով զբաղվող ընկերություններ են։ Այս մասին տեղեկացրել է Թուրքիայի առևտրի նախարար Ռուհսար Փեքջանը՝ պատասխանելով ընդդիմադիր Հանրապետական-ժողովրդական կուսակցության պատգամավոր Սեզգին Թանրըքուլուի՝ Թուրքիայում աշխատող սիրիացիների մասին հարցմանը:

Փեքջանի խոսքով՝ լիովին կամ մասամբ սիրիացիներին պատկանող ընկերություններում աշխատում է 10․046 սիրիացի։ Թուրք նախարարը տեղեկացրել է նաև, որ մարտի 31-ի դրությամբ Թուրքիայում աշխատանքի իրավունք ունեցող օտարազգիների թիվը կազմել է 96․972, որոնցից 31․185-ը սիրիացիներ են. հաղորդում է ermenihaber.am կայքը: