Ես պատրաստ եմ ՍԴ նախագահ լինել, բայց այդ հարցը լուծում են միայն դատավորները. Վահե Գրիգորյան

ՍԴ դատավորի թեկնածու Վահե Գրիգորյանը պատրաստ է ՍԴ նախագահ լինել, բայց, ըստ նրա, այդ հարցը լուծում են միայն դատավորները. ԱԺ-ում լրագրողների հետ զրույցում Գրիգորյանը նշեց. «Դատարանի նախագահի հարց չի քննվում այս պահին, ես թեկնածու եմ, հեռանկարում չեմ կարող ասել, եթե ասում եք` հեռանկարում էդպես են ասում: Ովքե՞ր են ասում, էդ հարցը լուծում են միայն դատավորները: Դատավորներն են որոշելու: Ես պատրաստ եմ, այո´»:

Նա անդրադարձավ նաև դիտարկմանը, թե, որոշ տեղեկությունների համաձայն, դատարանների դռները փակելու գաղափարը եղել է իրենը: «Դա իմ ոճը չէ, ես դրա մեջ վատ բան չեմ տեսնում, բայց դա իմ ոճը չէ: Եթե ինձ հետ պատահի նման բան, ես պիտի խնդրեմ` մուտքը բացեն, առաջին հերթին խոսելու եմ մարդկանց հետ: Դա պրակտիկա չէ, ամեն օր չեն գնում խանգարեն դատավորներին: Սա վերջին 2,5 տասնամյակի ընթացքում դատական իշխանության նկատմամբ արտահայտված վերաբերմունք է: Ես դրա մեջ հնարավորություն եմ տեսել, որպեսզի դատավորները խոսեն մարդկանց հետ: Պիտի ողջունեմ դատավորներին, որոնք դրանից չեն սարքել մեծ գլխացավանք, մտել հալածյալի կերպարանքի մեջ: Կան նաև դատավորներ, որոնք սուր են ընդունել, դա էլ չեմ քննադատում»,- պարզաբանեց Գրիգորյանը:

Ինչ վերաբերում է Ռոբերտ Քոչարյանի գործը վարույթ ընդունելուն, ապա նա ընդգծեց, որ ինքը եթե ընտրվի էլ, դեռ իրավասու չի լինելու որոշմանը մասնակից դառնալ:

Հարցին` այնուամենայնիվ, կո՞ղմ է վարույթ ընդունելուն, թե՞ պետք է մերժվի, Գրիգորյանը պատասխանեց. «Դա պիտի մերժվեր, դա պիտի արդեն մերժված լիներ: ՍԴ ներկայացվել է մի դիմում, որը հիմա վիճարկման փուլում է, ցանկացած պահին կարող է վերացվել, եթե ՍԴ-ն վերացրեց որոշումը, դիմումը վերացված է, բոլորի համար պարզ է, որ ՍԴ-ն, այլ տարբերակ չգտնելով, մերժել է»: