Քոչարյանը որոշեց հրաժարվել Փաշինյանի դեմ հայցից. վաղը դիմումը գրավոր կներկայացվի դատարան

Երևան քաղաքի ընդհանուր իրավասության դատարանի՝ Քանաքեռ նստավայրում, դատավոր Լիլիթ Սարգսյանի նախագահությամբ, տեղի է ունեցել «ՀՀ երկրորդ նախագահ Ռոբերտ Քոչարյանն ընդդեմ վարչապետ Նիկոլ Փաշինյանի» գործով դատական նիստը։

Հիշեցնենք, որ Ռոբերտ Քոչարյանի ներկայացուցիչ Հայկ Ալումյանի կողմից հայցադիմում է ներկայացվել Երևան քաղաքի ընդհանուր իրավասության դատարան՝ հրապարակայնորեն արտահայտված զրպարտությունից պատիվը և արժանապատվությունը պաշտպանելու պահանջի մասին:

Քոչարյանը 2018 թվականի սեպտեմբերի 17-ին դիմել է դատարան՝ հրապարակայնորեն արտահայտված զրպարտությունից պատիվը և արժանապատվությունը պաշտպանելու պահանջով: Հայցադիմում ներկայացնելու առիթը Ֆրանսիայի Հանրապետություն կատարած աշխատանքային այցի ժամանակ Նիկոլ Փաշինյանի հրապարակային հայտարարությունն է, որը վերաբերել է նաև Քոչարյանին: Հայ համայնքի հետ հանդիպման ժամանակ Փաշինյանը պարզաբանումներ է ներկայացրել, մասնավորապես՝ ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի հեռախոսազրույցի վերաբերյալ: Ուժային կառույցի ղեկավարների զրույցը վերաբերել է Ռոբերտ Քոչարյանին, Յուրի Խաչատուրովին:

Հայցվոր կողմը զրպարտություն է համարում Փաշինյանի զրույցի հետևյալ հատվածը. «Կամ` թեկուզ Ռոբերտ Քոչարյանին ազատ արձակելու մեկնաբանությունը: Ասում է՝ անձեռնմխելի է: Ի՞նչ է նշանակում` անձեռնմխելի: Այսինքն` կարելի է մարդկանց սպանությունը կազմակերպել ու ասել՝ ես անձեռնմխելի՞ եմ: Այդ որտե՞ղ է այդպես գրած»:

Մոտ մեկ ժամ հետո դատավորն առաջարկեց դատական նիստը հետաձգել և նախնական նիստի օրը նշանակել հոկտեմբերի 30-ին: Հայկ Ալումյանը կարճ ընդմիջում խնդրեց՝ ասելով, որ որոշ բաներ պետք է ճշտի: Ի դեպ, դատավորը ռեպլիկի կարգով հարցրեց, թե հնարավո՞ր է հայցադիմումից հրաժարվեն: 

Ալումյանի` դատարանի դահլիճ վերադառնալուց հետո պարզվեց, որ դա միանգամայն հնարավոր է: «Եթե մեր դատավարական հակառակորդը աներկբա հայտարարի, որ, այս հայտարարությունն անելով, պարոն Փաշինյանը նկատի չի ունեցել պարոն Քոչարյանին, ապա մենք պատրաստ ենք հրաժարվել հայցից: Նման դեպքում ես կխնդրեի նիստը նշանակել հնարավորինս շուտ»,- ասաց փաստաբանը՝  հավելելով, որ իր վստահորդի տեսակետն այս առնչությամբ ճշտված է:

Պատասխանողի ներկայացուցիչ Գևորգ Գյոզալյանը հայտարարեց, որ իր վստահորդը նկատի չի ունեցել Ռոբերտ Քոչարյանին, վերաբերել է սահմանադրաիրավական նորմի մեկնաբանությանը:

Դատավոր Լիլիթ Սարգսյանն առաջարկեց դատական նիստը նշանակել վաղը` ժամը 14.00-ին՝ պայմանով, որ հայցվոր կողմը հրաժարվելու է հայցադիմումից, և դրա վերաբերյալ որոշումը գրավոր ներկայացնելու  դատարան: