Ես չեմ կարծում, թե վարչապետն ընդունված է. Իգիթյանը վրիպե՞ց

Ինչո՞ւ Ղազախստանի մայրաքաղաք Նուր Սուլթանում գտնվող վարչապետ Նիկոլ Փաշինյանը հանդիպում չունեցավ ՌԴ նախագահ Վլադիմիր Պուտինի հետ: Այս հարցով այսօր խորհրդարանում լրագրողները դիմեցին ԱԺ արտաքին հարաբերությունների մշտական հանձնաժողովի նախագահի տեղակալ Հովհաննես Իգիթյանին:

Ի պատասխան նա ասաց` տեղյակ չէ` հանդիպում նախատեսվա՞ծ է եղել, թե՞ ոչ: Հետո հորդորեց՝ սպասել վարչապետին ու նրանից ստանալ հարցի պատասխանը:

Հովհաննես Իգիթյանին Yerkir.am-ի թղթակիցը հիշեցրեց, որ երկու երկրների ղեկավարների պլանավորված հանդիպման մասին նույնիսկ ՌԴ Դաշնային ժողովի Դաշնության խորհրդի նախագահ Վալենտինա Մատվիենկոն էր ասել դեռևս ապրիլին: «Եթե հարցը դա է, ես չեմ կարող ասել, վարչապետը կգա, կպատասխանի»,- ասաց նա:

Լրագրողներից մեկի հարցին, թե Փաշինյանի և Պուտինի չկայացած հանդիպումը, այն բանի ֆոնին, որ ՌԴ նախագահը հանդիպել էր ԵԱՏՄ մյուս երկրների ղեկավարների հետ, չի՞ նշանակում, որ ՀՀ վարչապետն ընդունված չէ ԵԱՏՄ-ում, Իգիթյանն արձագանքեց. «Ես չեմ կարծում, թե վարչապետն ընդունված է: ԵԱՏՄ-ն ունի իր կանոնակարգն ու ու  օրենսդրությունը` որպես կազմակերպություն, ու երկրները կարող են հարցեր բարձրացնել այդ կանոնադրության հետ կապված: Նախկինում նման պրակտիկա չի եղել, բոլոր երկրները, որ հարցեր են ունեցել, առանձին-առանձին են հստակեցրել Ռուսաստանի, այսպես ասած` Պուտինի հետ: Հիմա հարցերը բարձրացնում են կազմակերպության մեջ, որ համապատասխան լուծումներ գտնեն այդ հարցին: Հայաստանն էլ է բարձրացնում այդպիսի հարցեր, ու թվում է, թե այդ պրակտիկան Հայաստանից է եկել, և հիմա նույն էլ փորձում են անել ԵԱՏՄ մյուս անդամները: Եթե ԵԱՏՄ-ն աշխատի այս ձևով, ապա խնդիրները, որ եղել են նախկինում ու լարվածություն են մտցրել տարբեր երկրների միջև` Ռուսաստանի հետ կապված, կլուծվեն»: