Ռոբերտ Քոչարյան-Դաշնակցություն համագործակցության հարց օրակարգում չունենք. Արթուր Խաչատրյան

Ալեն Սիմոնյանի կարծիքն ինձ համար նշանակություն չունի. Սարդարապատում լրագրողների հետ զրույցում արձագանքեց ՀՅԴ Հայաստանի ԳՄ անդամ, գյուղատնտեսության նախկին նախարար Արթուր Խաչատրյանը Դաշնակցության հասցեին ԱԺ փոխնախագահ Ալեն Սիմոնյանի հնչեցրած հայտարարությանը, թե «դեղին քարտ է ցույց տալիս իշխանություններին մի կառույց, որին ժողովուրդը կարմիր քարտ է ցույց տվել»:

«Ես Ալեն Սիմոնյանի որևէ հայտարարություն մեկնաբանելու ցանկություն չունեմ: Ես հստակ նշեցի՝ նրա կարծիքն ինձ համար որևէ նշանակություն չունի»,- շեշտեց նա և հիշեցրեց. «Մի ուժ է գործում, որը ստեղծեց Հայաստանի Հանրապետությունը, որտեղ մենք հիմա կանգնած ենք, և որը գոյություն ունի 130 տարի: Հետաքրքիր կլինի` 3 կամ 13  տարի հետո նրա քաղաքական ուժը որտեղ կլինի»:

Հարցին՝ Դաշնակցությունը մնացե՞լ է այն արժեքներին, որոնք ի սկզբանե որդեգրել էր, ՀՅԴ ԳՄ անդամն արձագանքեց՝ առավել քան վստահ եմ: 

Հակադարձմանը՝ նախկին իշխանությունների հետ կոալիցիա կազմելով` հավատարի՞մ էր մնում այդ արժեքներին, Արթուր Խաչատրյանը  պատասխանեց. «Եթե խոսվում է նախկին իշխանությունների հետ կոալիցիա կազմելու մասին, այդ դեպքում պետք էր ազնիվ լինել և խոսել նախորդ իշխանության կողմից Դաշնակցության իրականացրած ծրագրերի մասին, որոնք այսօր շարունակվում են, այդ դեպքում պետք չէր այդ 100 կետի մեջ նշել, այն է՝ համայնքներին տրվող սուբվենցիաները և այլն: Այդ դեպքում պետք չէ ասել, որ ամեն ինչ վատ է եղել, բայց դրանք շարունակել: Եթե նախորդ իշխանություններն այդքան կոռումպացված էին, ապա ինչո՞ւ  այսօրվա կառավարությունում կան  նախկին իշխանության  ներկայացուցիչներ»: 

Դիտարկմանը՝ դուք նշել եք, թե որ ոլորտներում պետք է փոփոխություններ անի գործող իշխանությունը, և հարցին` արդյո՞ք իշխանության կողմից արձագանքներ եղել են, դաշնակցական գործիչը պատասխանեց. «Արձագանքներ եղել են բազմաթիվ, մեր մոտեցումը նույնն է եղել՝ խիստ մտահոգված ենք երկրում իրականացվող քաղաքականությունից, տնտեսական և ինստիտուցիոնալ, ինչպես նաև Արցախի հարցում վարվող քաղաքականությունից: Հստակ նշել ենք մեր մտահոգությունները՝ ինչ հարցում համաձայն ենք, ինչում՝ ոչ: Երբ նայում ես կառավարության նշած 100 նվաճումները, իրոք, լրջանալու խնդիր կա: Մի հատ նայեք և տեսեք, թե ինչերն են նշել որպես հաջողություն. ամուսնություններն ու ամուսնալուծությունները իշխանության հետ բացարձակապես կապ չունեն, անլուրջ էր նաև թատրոն գնացած մարդկանց թիվը, ավելի շատ գրքերը, անլուրջ է նաև, որ մարդկանց հագուկապը դիտվում է որպես նվաճում: Կամ՝ նախարարությունների միավորումը, քանի դեռ չենք տեսել դրա ազդեցությունը, դա որպես նվաճում չենք կարող ներկայացնել»:

Անդրադառնալով ՀՀ երկրորդ նախագահ Ռոբերտ Քոչարյանի և Դաշնակցության համագործակցության հնարավորության մասին հարցին` Արթուր Խաչատրյանը նշեց. «Ի՞նչ հարցի շուրջ: Ես հասկանում եմ, որ faktor.am-ին ամենաշատը հետաքրքրում են Դաշնակցություն-Ռոբերտ Քոչարյան հարաբերությունները, բայց կասեմ՝ Ռոբերտ Քոչարյան-Դաշնակցություն համագործակցության հարց օրակարգում մենք չունենք»:

Իսկ այն, որ Ռոբերտ Քոչարյանի փաստաբանը ներկա էր Դաշնակցության հավաքին, Խաչատրյանը նշեց, որ հավաքը բաց էր բոլորի համար, և որ իրենք «ոհմակի նման չեն հարձակվում և Ազատության հրապարակից որևէ մեկին չեն քշում»:

Ինչ վերաբերում է դատարանների մուտքերն արգելափակելու` վարչապետին կոչին, դրան հաջորդած  գործողությունների ինքնաբուխ լինելուն,  Խաչատրյանն ասաց, որ ինքնաբուխ ակցիայի դեպքում  բոլորը չեն կարող նույն ժամին հավաքվել և նույն ժամին էլ միահամուռ ցրվել: 

Այս համատեքստում դաշնակցական գործիչը նշեց, որ վեթինգի մասին լսել է միայն վարչապետից, մինչդեռ այն ընդհանուր կոնցեպցիա է իրենից ներկայացնում: «Պետք է մեխանիզմը ներկայացվի՝ և՛ վեթինգի, և՛ անցումային արդարադատության: Ասում են՝ սատանան մանրուքների մեջ է: Անցումային արդարադատություն իրականացվել է այն երկրներում, որոնք անցել են քաղաքացիական պատերազմի միջով: Դուք կարծում եք, որ ՀՀ-ն քաղաքացիական պատերազմի միջո՞վ է անցել: Մենք այս հարցում տարակարծիք ենք, որովհետև իշխանությունը ձևավորվեց այս երկրում գործող օրենքներին համապատասխան, հետևաբար` օրենքները գործել են, օրենքներով է, չէ՞, ձևավորվել իշխանությունը, օրենքներով են եղել 2018-ի դեկտեմբերի 9-ի ընտրությունները: Այսինքն՝ ներկայիս օրենսդրական բազան ինչո՞վ չի բավարարում, որ գնում ենք անցումային արդարադատության, կամ ի՞նչ է այն իրենից ներկայացնում, եթե դուք ամբողջական փաստաթուղթ տեսել եք, կիսվեք ինձ հետ, ես կնայեմ և կպատասխանեմ»,- ընդգծեց նա:

Արթուր Խաչատրյանը միաժամանակ շեշտեց՝ դատական ամբողջական համակարգում բարեփոխումներ են անհրաժեշտ՝ ոստիկանությունից մինչև քննչական մարմիններ, իհարկե` օրենսդրության սահմաններում: «Այսինքն՝ եթե օրենքը խոչընդոտ է, պետք է նախևառաջ օրենքը փոխել, հետո փոխված օրենքով ինչ-որ բան անել, բայց, իհարկե, օրենքին հետադարձ ուժ չտալ»,- նշեց Արթուր Խաչատրյանը և լրացրեց. «Ես Բաղրամյան 26-ում մի քանի անգամ եմ եղել, և իմ ներկայությամբ որևէ մեկը որևէ դատավորի չի զանգել: Դատական որոշումներ են կայացվել, որոնքբ մարդկանց վստահություն չեն ներշնչել, դա զանգի հետ ի՞նչ կապ ունի»:

Ինչ վերաբերում է Մարտի 1-ի գործին, Խաչատրյանը նշեց՝ ամեն ինչ պետք է բացահայտվի, մեղավորները պետք է օրենքի ողջ խստությամբ պատժվեն` անկախ նրանից, թե բարիկադի որ կողմում են եղել:

Հարցին՝ ՀՅԴ-ն քաղաքական ո՞ր մասում է, Արթուր Խաչատրյանը պատասխանեց. «Ձախ, ձախ ժողովրդավարական, սոցիալ-դեմոկրատական: Մենք սոցիալիզմ դավանող ձախ ընկերվարական ուժ ենք: Կամ՝ արտախորհրդանական ընդդիմություն, եթե դա եք հարցնում»:

ՀՅԴ ԳՄ անդամը նաև շեշտեց՝ այլևս որևէ  կառավարության մաս չեն կազմի, որտեղ էական ազդեցություն չեն ունենալու: