Անհետացման վտանգի տակ գտնվող լեզուների թեմայով ցուցահանդես` Թուրքիայում

Այսօր` մայիսի 23-ին, Թուրքիայում կբացվի մայրենի լեզվով մշակութային իրավունքների համար պայքարի թեմայով ցուցահանդեսը: Այդ մասին հաղորդում է Gazete Duvar լրատվական կայքէջը:

Աղբյուրի համաձայն` 1990-ականներից մինչ օրս Թուրքիայում անհետացման վտանգի տակ գտնվող լեզուների պահպանման ուղղությամբ պայքարի թեմայով սույն ցուցահանդեսը կրում է հետևյալ խորագիրը` «Մի լեզվի հետքերով. 90-ականներից մինչ օրս մշակութային ոլորտում պայքարը մայրենի լեզվի պահպանման նպատակով»: Ցուցահանդեսը գործելու է մինչև այս տարվա հունիսի 17-ը Ստամբուլի «Քարշը սանաթ» սրահում:

Ցուցահանդեսում ներկայացված կլինեն վերջին 30 տարիներին այդ բնագավառում կատարված աշխատանքները: Այն առավելապես կենտրոնացած կլինի չերքեզերենի, արևմտահայերենի, հայոց լեզվի Համշենի բարբառի, քրդերենի և լազերենի պահպանման ուղղությամբ արված քայլերի վրա:

Անցյալ տարվա տվյալներով` Թուրքիայի տարածքում խոսվող շուրջ 20 լեզու լիովին վերացման վտանգի տակ է: Դրանց շարքում են նաև արևմտահայերենը, Համշենի բարբառը, պոնտական հունարենը, ասորերենը, աբխազերենը, լազերենը, չերքեզերենը, գնչուների կողմից կիրառվող ռոմաներենը և այլ լեզուներ ու բարբառներ:

Մելինե Անումյան