ՌԴ ԱԳՆ-ի հայտարարությունը Լեռնային Ղարաբաղի, Հայաստանի և Ադրբեջանի միջև կնքված հրադադարի համաձայնագրի 25-ամյակի առթիվ

ՌԴ ԱԳՆ-ն հայտարարություն է տարածել 1994 թվականի մայիսի 12-ին Հայաստանի, Լեռնային Ղարաբաղի և Ադրբեջանի միջև ստորագրված հրադադարի համաձայնագրի 25-ամյակի առթիվ: Այդ մասին ասվում է գերատեսչության պաշտոնական կայքում:

«Պայմանավորվածությունը ձեռք է բերվել Ռուսաստանի Դաշնության միջնորդությամբ: Մայիսի 12-ին կնքված համաձայնագիրը հնարավորություն տվեց դադարեցնելու զանգվածային արյունահեղութունը և սկիզբ դնելու ԼՂ հակամարտության կարգավորման գործընթացին: Մայիսի 12-ի համաձայնագիրը մինչ օրս հրադադարի ռեժիմի պահպանման հիմքն է»,- ասվում է հայտարարությունում:

Նշվում է, որ ԼՂ հակամարտության կարգավորման գործընթացը բարդ է, այն ապրում է վերելքներ և վայրէջքներ:

«Պահանջվում է ժամանակ և գործընթացի մասնակիցների քաղաքական կամքը, որպեսզի հասնենք համաձայնության հակամարտության առանցքային տեսակետների  շուրջ: Մենք տեսնում ենք կողմերի պատրաստակամությունը` շարունակել համատեղ աշխատանքը, որն ուղղված է կայուն խաղաղության ձեռք բերմանը: Այդ մասին են մասնավորապես վկայում Վիեննայում Հայաստանի և Ադրբեջանի առաջնորդների և Մոսկվայում ԱԳ ղեկավարների`  վերջերս կայացած բանակցությունների  արդյունքները:

Մեր կողմից Բաքվին և Երևանին ակտիվ աջակցություն կցուցաբերենք փոխզիջումային լուծումներ գտնելու հարցում: Ինչպես և նախկինում,  մենք կշարունակենք հետևողական միջնորդական ջանքերը` որպես ԵԱՀԿ ՄԽ համանախագահ երկիր` ԱՄՆ-ի և Ֆրանսիայի հետ համատեղ»,- ասվում է հայտարարությունում: