Ռոբերտ Քոչարյանը մտադիր է մասնակցել ընդդիմության աշխատանքներին

ՀՀ  երկրորդ նախագահ Ռոբերտ Քոչարյանը հայտարարել է, որ Հայաստանում ի հայտ են գալիս նոր քաղաքական գործիչներ և ընդդիմադիր կուսակցություններ, ինչը կհանգեցնի «հզոր քաղաքական ուժի» ձևավորման, և ինքը մտադիր է մասնակցել այդ ընդդիմության աշխատանքին: Այդ մասին, ըստ РИА Новости-ի, գրում է «Ռոյթերս»-ը:

«Այո, իհարկե»,- ասել է կալանքի տակ գտնվող Քոչարյանը գործակալության հետ զրույցում` պատասխանելով հարցին` մտադի՞ր է անձամբ մասնակցել ընդդիմության աշխատանքին:

Նրա խոսքով` անցած տարի տեղի ունեցած զանգվածային բողոքի ակցիաները «հասարակության շրջանում կուտակված դժգոհության և փոփոխությունների ցանկության հետևանք էին»:

«Ես դա հեղափոխություն չէի անվանի, քանի որ մեծ հաշվով երկրում ոչինչ չի փոխվել, բացառությամբ հասարակության շրջանում ագրեսիայի մեծ չափաբաժնի և ղեկավարության շրջանում պոպուլիզմի ու դիլետանտության հայտնվելուն»,- ասել է ՀՀ երկրորդ նախագահը: