Թուրք վարձկաններն ապրիլի 24-ի նախօրեին հարձակվել են հայկական ընտանիքների վրա

Թուրք վարձկաններն ապրիլի 23-ին` Հայոց ցեղասպանության զոհերի հիշատակման օրվա հետ կապված, հարձակվել են սիրիական Էլ Բաբ քաղաքի հայ ընտանիքների վրա, և բախում է տեղի ունեցել երկու կողմերի միջև. հաղորդում է Բելգիայում գործող քրդական Hawar լրատվական գործակալությունը:

Ըստ Էլ Բաբից հաղորդված աղբյուրների` բախումները սկսվել են երեքշաբթի` ժամը 19:00-ի սահմաններում, թուրքական զինուժի կողմից բռնազավթված Էլ Բաբ քաղաքում. թուրք վարձկանները հարձակվեցին քաղաքի` հայկական ծագում ունեցող բնակիչների վրա: Գործակալությունը նշում է, որ դեռևս անհայտ է հարձակումների պատճառը: Էլ Բաբի հոսպիտալ են տեղափոխվել բազմաթիվ վարձկաններ:

Գործակալությունն ուշադրություն է հրավիրում այն փաստի վրա, որ հաջորդ օրը ապրիլի 24-ն է` Օսմանյան կայսրության կողմից իրականացված հայերի կոտորածների օրը, սակայն զերծ է մնում կոտորածները ցեղասպանություն որակելուց: