Սիրիացի վարձկաններն Ադրբեջանում խառնաշփոթ են առաջացրել. ահազանգում են ադրբեջանական ԶԼՄ-ները

Ադրբեջանական բանակին աջակցելու նպատակով Ադրբեջանի սահմանամերձ գյուղերում տեղակայված սիրիացի զինյալները իսկական պատուհաս են դարձել տեղի բնակիչների համար, նրանց միջև բախումներ են սկսվել: Շրջանառվող այս լուրի մասին հաղորդել են նաև ադրբեջանական ընդդիմադիր ԶԼՄ-ները:

«Սիրիացի զինյալները խառնաշփոթ են առաջացրել: Տեղեկատվության համաձայն՝ տեղի բնակիչների ու սիրիացի գրոհայինների միջև արդեն երկու օր է՝ բախումներ են տեղի ունենում: Մերձավոր Արևելքից եկած զինյալները վատ են վերաբերվում գյուղացիներին, մասնավորապես՝ նրանք վիրավորում են, սպառնում, կանանց թույլ չեն տալիս տնից դուրս գալ առանց հիջաբի: Բացի դրանից՝ «հյուրերը» հարձակվում, թալանում են տեղի խանութները, թույլ չեն տալիս ալկոհոլ վաճառել և օգտագործել: Այլ խոսքով՝ զինյալները շարիաթի օրենքն են կիրառում»,-հայտնել են ԶԼՄ-ները:

Ավելի լուրջ ու լայնամասշտաբ բախումներից խուսափելու համար գործին միջամտել է ռազմական ոստիկանությունը, որը բռնի կերպով ինչ-որ կերպ կարողացել է իրավիճակը ժամանակավորապես շտկել: Գյուղաբնակ ադրբեջանցիներն ընդգծել են, որ տագնապալին այն է, որ նրանք ստիպված են դիմակայել սիրիացի զինյալներին, որոնք կռվում են հենց ադրբեջանցիների կողմից:

Ըստ հետախուզության տվյալների՝ Սիրիայից մոտ 4000 գրոհային է մասնակցում Ադրբեջանի սանձազերծած ռազմական գործողություններին։ Գրոհայինների շարքում կան զոհեր: