Հայրս կցանկանար, որ այսօր ես իմ ամբողջ ընտանիքի անունից լինեմ այստեղ. Նիկոլա Ազնավուր

Այսօր՝ ապրիլի 24-ին, Ծիծեռնակաբերդի բարձունքում էր նաև ֆրանսահայ երջանկահիշատակ շանսոնյե Շառլ Ազնավուրի որդին՝ Նիկոլա Ազնավուրը:

Լրագրողների հետ զրույցում նա նշեց, որ այստեղ է եկել իր ամբողջ ընտանիքի անունից:

«Զգացի այն, ինչ զգացել եմ` հորս կողքին լինելով: Ես զգացի, որ այսօր նա մեզ հետ է՝ ճիշտ այնպես, ինչպես մյուս բոլոր այն մարդիկ, որոնք եկել են հարգելու Հայոց ցեղասպանության զոհերի հիշատակը: Կարծում եմ՝ նրա ցանկությունը կլիներ, որ այսօր ես իմ ամբողջ ընտանիքի անունից լինեմ այստեղ»,- նշեց Նիկոլա Ազնավուրը՝ հավելելով, որ շարունակելու է բարձրացնել Հայոց ցեղասպանության ճանաչման հարցը, ինչպես դա արել է հայրը՝ Շառլ Ազնավուրը: 

«Բայց ուզում եմ շեշտել, որ նա երբեք այլ ազգի նկատմամբ ատելությամբ լցված չէր, միշտ երազում էր խաղաղության ու երջանիկ երիտասարդության մասին, որը կապրի խաղաղության մեջ»,- հավելեց Նիկոլա Ազնավուրը: