Հովիկ Աբրահամյանը շատ կցանկանար նվազեցնել ամուսնալուծությունների թիվը

Այսօր կառավարության նիստում ՀՀ արդարադատության նախարար Հովհաննես Մանուկյանը ներկայացրեց կառավարության որոշման մեջ փոփոխություն կատարելու մասին որոշման նախագծ, ըստ այդմ` տարեսկզբին սահմանվել էր ձեռք բերել 3000 ամուսնալուծության վկայականներ, սակայն, վերլուծելով առաջին կիսամյակի արդյունքները, անհրաժեշտություն է առաջացել 2-րդ կիսամյակի համար ավելացնել ամուսնալուծության վկայականների քանակը:

Արդարադատության նախարարի հիմնավորմամբ`  քաղաքացիներին տրամադրվող ամուսնալուծության վկայականները չեն բավականացնում, իսկ 2014 թվականի առաջին կիսամյակի կտրվածքով` պոլիգրաֆիական որոշ արտադրանքներ օգտագործվել են ավելի քիչ, քան նախատեսված էր տարեսկզբին ՀՀ կառավարության կողմից:

Առաջարկվում է  կրճատել արդարադատության նախարարության գործունեության ընթացքում օգտագործվող պոլիգրաֆիական որոշ արտադրանքներ և  կրճատման արդյունքում ընդհանուր գումարից 1114.2 հազ. դրամը նպատակաուղղել ամուսնալուծության վկայականների տպագրման ավելացմանը:

ՀՀ վարչապետ Հովիկ Աբրահամյանը հարցրեց նախարարին. «Հասկացա, որ ամուսնալուծությունները շատացել են, հա՞, պարո'ն Մանուկյան»:

Արդարադատության նախարարը սկսեց պաշտպանվել, թե դա իրենց խնդիրը չէ:

«Չեմ ասում ձեր գործն է, հակառակ իմաստով` կարելի է այնպես անել, որ ամուսնալուծությունների թիվը նվազի»,- ասաց Հովիկ Աբրահամյանը, ապա դիմեց սոցիալական հարցերի նախարարին. «Սոցիալական հարցերի նախարարը թող մի հատ վերլուծություն անի, հասկանանք, թե ինչումն է խնդիրը»: Ապա վարչապետը ծիծաղեց իր ասածի վրա: