Տնօրենուհին ճիշտ արեց, որ հրաժարական տվեց. Թուխիկյանը` Ավշարի դպրոցի մասին

Որևէ համայնքապետի, որևէ պաշտոնյայի ազգական չպետք է արտոնյալ լինի ու ըստ այդմ նշանակվի որևէ պաշտոնի, և օրակարգից պետք է դուրս գա այդ երևույթը. Yerkir.am-ի հետ զրույցում, անդրադառնալով Ավշար համայնքի դպրոցի տնօրենի ընտրությանը հաջորդած աղմկահարույց դեպքերին,  ասաց «Իմ քայլը» խմբակցության պատգամավոր Նարինե Թուխիկյանը:

Նախորդ տարվա իրադարձությունները, ըստ նրա, նաև նրա համար էին, որ արատավոր այդ երևույթը` ծանոթով, փողով պաշտոններ զբաղեցնելու պրակտիկան,  մոռացվի:

«Իսկ ընտրված տնօրենուհին, անկախ հանգամանքից` կար հովանավորչություն, թե` ոչ, ճիշտ արեց, որ հրաժարական տվեց: Նախ` ընտանեկան հարցեր ուներ, ու ես շատ հուզվեցի, երբ իմացա, որ երեխայի է սպասում: Այդ լարված մթնոլորտն ազդելու էր նրա վրա: Բացի այդ` անընդունելի է, երբ երեխաներին ներքաշում են  այդպիսի գործընթացների մեջ: Երեխաները չեն հասկանում, ու այն, ինչ բարձրաձայնում են, գոռում են, գոչումն են, իրենցից չէ: Բոլորս ենք հասկանում, որ նրանք ուղղորդված են ուսուցիչների կամ ծնողների կողմից: Ամեն դեպքում, սա թող նախադեպ լինի, որ ընտրությունները մաքուր անցնեն: Մանավանդ կրթական հաստատություններում շատ զգույշ պետք է լինել, ազնվությունը գերաստիճան պետք է լինի»,- ասաց մեր զրուցակիցը: