100 տոկոսով վստահ չեմ, որ նախկին իշխանավորներն օգտագործում են ունեցած ուղիները դատական համակարգի վրա ազդելու համար. Փաշինյան

ՀՀ վարչապետ Նիկոլ Փաշինյանն ընդունում է՝ միայն ղեկավարության կողմից դատավորներին զանգելու պրակտիկան վերացնելը  բավարար չէ դատական համակարգի բարելավման համար, որ այն լինի լիարժեք անկախ:

«Իհարկե, բավարար չէ, բայց անհրաժեշտ պայման է, որովհետև առանց դրա ուղղակի անհնար է դատական անկախ համակարգ ունենալ: Եվ եթե մենք դա իրականում երաշխավորենք, դատական համակարգի ներսում  պրոցեսներ կսկսվեն, որոնք իրապես կբերեն  դատական համակարգի անկախացման: Այսինքն՝ եթե մենք երկու բան երաշխավորենք` առաջին՝  իշխանական թելադրանք չի լինելու, ընդ որում՝ իշխանական թելադրանք ասելով` պետք չէ հասկանալ միայն իմ միջամտությունը, հարցին պետք է բազմակողմ նայել, որովհետև եթե երկրի ղեկավարը դադարում է դատարանին հրահանգ տալ, բայց դատական համակարգը սովոր է այդ շրջանում այդպես աշխատել, վակուում է առաջանում, դատարկ տեղ: Ես երբեմն ստանում եմ տեղեկություններ, որի հեղինակներն ինձ հավաստիացնում են՝ Դուք չեք միջամտում, բայց իշխանության մեջ կան օղակներ, որոնք հնարավոր է` միջամտում են: Ես բոլոր նման դեպքերին արագ արձագանքում եմ՝ հասկանալու համար՝ կա՞ նման բան, թե՞ չկա: Ապացույցներ այս պահին չունեմ, որ նման բան եղել է, և երբ կունենամ ապացույցներ, այդ մարմնի ղեկավարը, այդ գործողությունը թույլ տված պաշտոնյան տեղում կազատվի աշխատանքից, տեղում՝ առանց այս ու այն կողմի:

Երկրորդ՝ երբ ասում ենք` նախկինում իշխանություններից հրահանգ է գնացել, դա կոնկրետ անձանց միջոցով է եղել, հիմա այդ անձինք կան, նրանք ունեն նույն հեռախոսի համարները, նույն ուղիները, որոնցով այդ հրահանգները տալիս էին, ոմանք մինչև հիմա նույնիսկ կառավարական կապ ունեն՝ օրենքով հասնում է նրանց: Հարց՝ արդյո՞ք այդ ուղիներն օգտագործվում են` դատական համակարգի վրա ազդելու համար: Ես 100 տոկոսով վստահ չեմ, համոզված չեմ:

Երրորդ՝ արդյո՞ք այսօր մեր դատական համակարգում կաշառք կա: Ես այս հարցին 100 տոկոսով չեմ կարող բացասական պատասխան տալ, որովհետև եթե մեր երկրի հարկային մարմիններում, այլ պետական մարմիններում դեռ տեսնում ենք` ձերբակալություններ են տեղի ունենում, զինկոմիսարիատներում կաշառքի դեպքեր կան, 100 տոկոսով վստահ ասել, որ դատական համակարգում կաշառք չկա, ես չեմ կարող: Չնայած 100 տոկոսով կարող եմ ասել, որ մենք բոլոր հնարավոր միջոցներն օգտագործում ենք դա կանխելու,  բացահայտելու ու գործողություններ անելու համար: 

Հիմա եթե այս երեք ուղիները մենք փակենք, դատական համակարգը կդառնա շատ անկախ: Բայց, մյուս կողմից, չենք թողնում բարձիթողի: Այո, մենք խնդիր ունենք մեր դատական համակարգը բերելու եվրոպական, համաշխարհային չափանիշներին: Սա է պատճառը, որ կարևորում ենք ԵՄ-ի հետ մեր համագործակցության զարգացումն այս ուղղությամբ: Այս հարցում մենք վճռական ենք: Թող որևէ մեկը չկասկածի, թե որևէ պահի կարող ենք մտածել՝ լավ, այնումենայնիվ, այս դատական համակարգը մեզ պետք է մեր քաղաքական նպատակներն օգտագործելու համար: Չի լինի նման բան: Անձամբ իմ կողմից բացառվում է, որովհետև դա մեր ժողովրդի առջև իմ ունեցած պարտավորությունն է: Եթե կլինեն այլ պաշտոնյաներ, որոնք կփորձեն այդպիսի բան անել, այդ պաշտոնյաների գործողություններին կլինի շատ կոնկրետ արձագանք»,-շեշտեց Փաշինյանը՝ հավելելով, որ ԵՄ-ին և Եվրախորհրդին վստահեցրել են, որ անելու ենք ամեն ինչ` անկախ դատական համակարգ ունենալու համար:

Վարչապետը վստահեցրեց, որ դատավորներին սոցիալական երաշխիքներ տալու ուղղությամբ գործողություններ են կատարել, իսկ ներկայումս նոր օրենքների մշակման գործընթաց է սկսվել: Ավելին` քննարկվում է դատական համակարգը բեռնաթափելու խնդիրը, քանի որ շատ դեպքերում գործ ունենք ոչ թե դիտավորյալ և անարդար որոշումների հետ, այլ դատավորները շատ ծանրաբեռնված են:  «Կա գաղափար՝ մի շարք պարզ  գործերի լուծումը պատվիրակել նոտարներին, և այդպես շարունակ: Կարևոր են  նաև դատարանների շենքային պայմանները, թե դատավորներն  ինչ պայմաններում են  աշխատում, ինչ տեխնիկական հագեցվածություն կա»,- նշեց նա: