Եթե փնտրում եք ահաբեկչական պետություն, ապա դա Իսրայելն է. Էրդողան

Այսօր Թուրքիայի նախագահ Ռեջեփ Թայիփ Էրդողանը Այնթափ քաղաքում տեղի ունեցած հանրահավաքում դարձյալ քննադատել է Իսրայելի վարչապետ Բինյամին Նեթանյահուին. հայտնում է «Անադոլու» գործակալությունը:

«Նեթանյահուն դաժան բռնակալ է: Եթե աշխարհում փնտրում եք ճնշող երկիր, ապա դա Իսրայելն է, եթե փնտրում եք ահաբեկչական պետություն, ապա դա էլ է Իսրայելը:  Իսրայելը ղեկավարող այդ թալանչի, դատական գործընթացների մեջ հայտնված և ամեն տեսակի կոռուպցիայի մեջ մեղադրվող վարչապետի որդին «Թվիթեր»-ում գրում է, որ Ստամբուլը Բյուզանդիայի քրիստոնեական կենտրոնն է: Ա'յ անդաստիարակ, դուք ամբողջ Պաղեստինն եք բռնազավթել»,- ասել է Էրդողանը:

Նա նաև անդրադարձել է այսօր Նոր Զելանդիայում տեղի ունեցած ահաբեկչությանը: «Մենք` որպես մուսուլմաններ, երբեք գլուխներս չենք կախելու, բայց նաև երբեք այս ցածրոգիների մակարդակին էլ չենք իջնելու»,- նշել է Թուրքիայի նախագահը: