Հանձնաժողով է ստեղծվել պատմության դասագրքերում Մարտի 1-ի իրադարձությունների ներկայացումը վերանայելու նպատակով. Արայիկ Հարությունյան

ՀՀ կրթության և գիտության նախարարի հրամանով ստեղծվել է պատմության մասնագետներից կազմված հանձնաժողով, որը քննարկում է պատմության դասագրքերի վերանայման հարցը՝ պայմանավորված 2008թ.ի մարտի 1-ի իրադարձությունների ներկայացմամբ: Այս մասին ԱԺ-ում լրագրողների հետ ճեպազրույցում ասաց նախարար Արայիկ Հարությունյանը:

«Իմ հրամանով ստեղծվել է բուհերից, դպրոցներից պատմության մասնագետների ներգրավմամբ հանձնաժողով: Եվ հիմա այդ ուղղությամբ քննարկում է ընթանում: Կարծում եմ, որ քննարկումներից հետո եզրակացություն կներկայացնենք: Խնդիրները կոնկրետ պատմության դասագրքերում Մարտի 1-ի իրադարձությունների ներկայացման հետ են կապված»,- ասաց ԿԳ նախարարը, միաժամանակ հավելելով` ինքն անձամբ չի ուսումնասիրել դասագրքերը, սակայն հրապարակումներից ծանոթ է, որ թյուր ինֆորմացիա է տրվում:

Նախարարը նաև խոսեց ուսուցիչների աշխատավարձերը բարձրացնելու մասին: Հարությունյանը կոնկրետ չափ  չկարողացավ նշել: «Թե' վարչապետը, թե' ես բազմիցս հայտարարել ենք, որ ուսուցիչների դրույքերի, աշխատավարձերի հետ կապված հարցը մեր օրակարգում է և առաջնային խնդիրներից է: Ամբողջական պատկերացում ունենալուց հետո կխոսենք աշխատավարձերի բարձրացման վերաբերյալ: Նախնական պետք է ասեմ, որ մեր ծրագրերում կա արդեն սեպտեմբերից  աշխատավարձերը բարձրացնելու հարցը»,- ասաց նա: