Հայիթիի նախագահը հրաժարվել է պաշտոնաթող լինել

Հայիթիի նախագահ Ժովենել Մոյիզը հայտարարել է, թե չի նախատեսում պաշտոնաթող լինել` չնայած բողոքի զանգվածային ակցիաների մասնակիցների կոչերին, որոնք ավելի քան մեկ շաբաթ տեղի են ունենում կարիբյան այս երկրում: Այս մասին հաղորդում է Le Nouvelliste թերթը:

«Ես՝ պետության ղեկավար Ժովենել Մոյիզս, երկիրը չեմ հանձնի զինված խմբավորումների ու թմրավաճառների ձեռքը», - հայտարարել է  նա՝  հինգշաբթի  երեկոյան հանդես գալով ազգին հղած ուղերձով:

Նախագահն ընդգծել է, որ «լսում է ժողովրդի ձայնը և գիտի նրան հուզող խնդիրների մասին»: Նրա խոսքով՝ «կառավարությունը միջոցներ է ձեռնարկում դրանց լուծման համար»:

Հայիթին ընդգրկած զանգվածային բողոքների զոհ է դարձել առնվազն յոթ մարդ: Զոհերից վերջինը երիտասարդ է, որին սպանել են Պորտ օ Պրենսի նախագահական պալատից բառացիորեն մի քանի մետր հեռու: Նաեւ` ոստիկանության և  ցուցարարների ընդհարումների ընթացքում վիրավորվել է մի լրագրող:

Բողոքի ակցիաների մասնակիցների հիմնական մասը ամենաաղքատ շրջանների բնակիչներն են, որոնք պահանջում են նախագահ Ժովենել Մոյիզի հրաժարականը՝ նրա կառավարությանը մեղադրելով քաղաքացիներին ամենաանհրաժեշտ բաներով ապահովել չկարողանալու մեջ: