Մեղավոր հրամանատարներին հնարավոր է պաշտոնաթող անեն

Երեկ պաշտպանության նախարար Սեյրան Օհանյանը արտակարգ նիստ է հրավիրել նույն օրը Արմավիրի մարզի «Բաղրամյան» ուսումնական կենտրոնում ճամբարային հավաքների մասնակցող ՀՀ ՊՆ N զորամասին պատկանող «Սատկո» մակնիշի ավտոմեքենայի վթարի կապակցությամբ: Վթարի հետեւանքով ավտոմեքենայի թափքում գտնվող ժամկետային զինծառայողներից 6-ը տարբեր աստիճանի մարմնական վնասվածքներով տեղափոխվել են Արմավիրի քաղաքային հիվանդանոց: Ժամկետային զինծառայող, ավագ, 21-ամյա Հայկ Արշակի Դավթյանը մահացել է Արմավիրի հիվանդանոցում:

Պաշտպանության նախարարի մամուլի խոսնակ Դավիթ Կարապետյանի տեղեկացմամբ` ներկա պահին միջադեպի կապակցությամբ անցկացվում է ծառայողական քննություն, որի արդյունքների հիման վրա էլ նախարարը համապատասխան որոշումներ կկայացնի:

Մեր տեղեկությունների համաձայն` արտակարգ նիստին մասնակցել են նաեւ միջադեպի պատասխանատու հրամանատարները, որոնք խիստ նկատողություն են ստացել, սակայն չի բացառվում, որ նրանց ազատեն աշխատանքից: