Ժողովրդին կհամախմբենք իշխանության դեմ այն ժամանակ, եթե որդեգրեն «Զիջենք, որ զարգանանք» սկզբունքը. Ռուստամյան

Հրանտ Մարգարյանն իր ելույթով արտահայտել է այն, ինչ մենք ամբողջ նախընտրական քարոզարշավի ընթացքում հրապարակի վրա ասել ենք. մամուլի ասուլիսում հայտարարեց ՀՅԴ Բյուրոյի նորընտիր նախագահ Արմեն Ռուստամյանը` անդրադառնալով ՀՅԴ Բյուրոյի նախկին ներկայացուցիչ Հրանտ Մարգարյանի կոշտ քննադատություններին իշխանության հասցեին:

«Մենք շատ հստակ ասել ենք, թե ինչու ենք մտել այս ընտրական պայքարի մեջ, և ասել ենք, որ մտել ենք որպես ընդդիմություն, ձևակերպել ենք մեր ընդդիմադիր կեցվածքը` թե' արտաքին թե' ներքին հարցերի մասով»,- նշեց նա:

Ըստ Ռուստամյանի` անցյալի` 90-ականների դասերը հանգեցնում են այն եզրակացության, որ կա շատ մեծ վտանգ, որ նույն սխալը կկրկնենք: «Դրա համար ես միշտ ասել եմ, որ սա դեժա վյու է հիշեցնում: Անհանգստությունը շատ հստակ է` նորը չլինի լավ մոռացված հնի կրկնություն: Այսինքն` մենք չպետք է բերենք նրան, որ հին մենաշնորհը փոխարինվի նոր մենաշնորհով: Մենք 5 խնդիր էինք դրել, որով էլ պայմանավորել էինք հետագա համագործակցությունը Նիկոլ Փաշինյանի հետ: Այդ խնդիրներից մեկն այն էր, որ մենք պետք է ամրապնդեք խորհրդարանական համակարգը և լուծենք իրենց իսկ կողմից ձևակերպված` սուպերվարչապետական համակարգի խնդիրը: Սուպերվարչապետական համակարգից հրաժարում մենք այսօր չենք տեսնում: Նախարարությունների հետ կապված փոփոխությունները, որ բերել էին, դրանով ակնկալում էինք տեսնել ներքին գործերի նախարարության ամրագրում. այդ կերպ ոստիկանության և մի շարք այլ կառույցների վերահսկողությունը կփոխանցվեր ԱԺ-ին»,- ասաց նա:

Ըստ Ռուստամյանի` կան խորքային հարցեր: «Նոր իրավիճակում, երբ պատասխանատվությունն ամբողջապես մեկ քաղաքական ուժին է պատկանում, այդ հարցերին պետք է շատ ուշադիր հետամուտ լինել: Մենք դեռ ունենք հույս, որ, ինչպես ասացի, կզարգանանք` չզիջելով: Այսինքն` սեփական ռեսուրսի վրա կենտրոնանալով` կզարգանանք այնպես, ինչպես կպահանջեն մեր շահերը: Մենք առայժմ դա չենք տեսնում, կգա ծրագիր, կկատարվեն քայլեր, կտեսնենք, բայց հույս ունենք, որ կգնա այդ ուղղությամբ: Եթե այդ քայլերը կատարվեն, մենք համագործակցելու որևէ խնդիր չունենք»,- ասաց նա:

Հարցին` ժողովրդին չե՞ն համախմբի իշխանության դեմ, Ռուստամյանը պատասխանեց. «Կհամախմբենք, եթե լինի հակառակ ծրագիրը` զիջենք, որ զարգանանք: Եթե այդպիսի վիճակ եղավ, կհամախմբենք: Դա արել ենք Լևոն Տեր-Պետրոսյանի ժամանակ, դա արել ենք Սերժ Սարգսյանի ժամանակ` «Ոչ»-ի շարժումով, և եթե հիմա նոր իշխանությունները նման զիջումների չպետք է գնան և ռեսուրսը մեր մեջ ամրացնելու քաղաքականություն տանեն, մենք ամբողջությամբ կսատարենք այդ իշխանությանը»: