Նոր կոշիկները պահեստավորման փուլում են, կլինի փոփոխություն բուն համազգեստի կտորի հետ կապված. ԳՇ պետ

ՀՀ ԶՈՒ գլխավոր շտաբը նախքան զորակոչը կոռուպցիայի մասին որևէ ահազանգ չի ստացել: Այս մասին լրագրողներին հայտնեց ՀՀ ԶՈւ ԳՇ պետ Արտակ Դավթյանը:

««Թեժ գծի» վերաբերյալ համապատասխան հայտարարություն կանեն պաշտոնատար անձինք: Գլխավոր շտաբում մենք չենք ստացել ահազանգեր»,- շեշտեց նա:

Անդրադառնալով պաշտոնյաների որդիների ծառայությանը` Արտակ Դավթյանը վստահեցրեց, որ գլխավոր շտաբը որևէ ձևով չի տարանջատում պաշտոնյայի երեխային մյուս երեխաներից:  «Մենք բոլորին, ըստ կարգի, զորակոչում ենք բանակ: Եթե ազատվում են, ապա ազատվում են ըստ օրենքի, և որևէ տարբերակում չենք դնում, ուստի որևէ վիճակագրություն չունենք: Իսկ դուք իրավունք ունեք ցանկացած պաշտոնյայի պաշտոնական հարցում ուղարկելու և ստանալու պատասխան: Ուրիշ բան չեմ կարող ասել: Ես չեմ հետաքրքրվում՝ որևէ նախարարի երեխա գնո՞ւմ է բանակ, թե՞ ոչ, իմ ինչի՞ն է դա պետք: Եթե որևէ տարբերություն չկա, եթե վիճակահանությանը մասնակցում են, գնում են ծառայության, մանավանդ` վարչապետի, պաշտպանության նախարարի երեխաները ծառայում են զինված ուժերում, եթե ինչ-որ մեկին առավելություն չենք տալիս, այդ դեպքում  ինչո՞ւ պետք է հետաքրքրվենք որևէ մեկի երեխայի հարցով»,- հայտարարեց Արտակ Դավթյանը:

Ըստ նրա` բոլորին ծանուցում ուղարկվում է` ըստ զորակոչի, ովքեր չեն գալիս, իրավապահ մարմիններն են նրանցով զբաղվում:

Ինչ վերաբերում է զինվորների կոշիկներին, Արտակ Դավթյանն ասաց, որ կոնկրետ այս զորակոչիկներին ապահովում են նույն կոշիկներով, ինչ նախորդներին:

«Նոր կոշիկներն արդեն պահեստավորման, ընդունման փուլում են, ավարտելուց հետո կհատկացվեն զորամասերին` ըստ հասանելիության, ոչ թե նորակոչիկներին: Հագուստի առումով որակական փոփոխություն լինելու է, ներքնաշորերն արդեն փոխվել են, մեկանգամյա ներքնաշորերից հրաժարվեցինք: Կկլինի փոփոխություն բուն համազգեստի կտորի հետ կապված»,- տեղեկացրեց ԳՇ պետը:

Անդրադառնալով ծնողների կողմից ծանրոցներ ուղարկելու խնդրին, որը շարունակվում է նաև այսօր, Արտակ Դավթյանը նշեց՝ ինչ տրվում է այսօր զինծառայողին, բավարար է կենցաղն ապահովելու և մարտական խնդիր կատարելու համար:

«Եթե մայրը լրացուցիչ իրեղեն, նյութական միջոցներ է ուղարկում է, դա այլ խնդիր է: Երկրորդ՝ մենք սոցիալական տարբեր շերտավորման և բնավորության մարդիկ ենք զորակոչում բանակ, որոնք ունեն տարբեր պահանջներ և տարբեր մոտեցումներ, միշտ ուզում են, որ ծնողներն իրենց ուշադրության կենտրոնում պահեն՝ պահանջելով այս կամ այն առարկան՝ անկախ նրանից, թե դա իրենց պետք է, թե` ոչ: Մյուս կողմից` մեր` հայկական սովորության համաձայն, մյուսներից հետ չմնալու համար՝ մեկի ծնողն ուղարկեց, ինչու իր ծնողը չուղարկեց: Կարող ենք անհատական նայել, եթե խնդիր կա համազգեստի, կոշիկի, ներքնաշորի հետ կապված, պատրաստ ենք քննարկել: Ընդհանրապես, կարծում ենք՝ ճիշտ չէ արգելել, որ մայրը կամ ծնողը ինչ-որ բան ուղարկի: Վերջին օրերին քաղցրավենիք են շատ ուղարկում, հիմա արգելե՞նք, ասենք` չի՞ կարելի: Եկեք միասին հասկանանք պատճառը՝ ինչո՞ւ է ուղարկում ծնողը, ինչո՞ւ է երեխային դա պետք կամ պետք չէ: Պատճառները հասկանանք, որպեսզի կատարենք: Կրկնում եմ՝ համազգեստով ամբողջությամբ ապահովված են, ժամկետները փոխեցինք, ներքնաշորերի հարցը բարձրացվեց, և դրանք փոխվեցին, կոշիկների հետ կապված` նոր ասացի»,- նշեց Արտակ Դավթյանը՝ լրացնելով, որ բանակն օճառ տալիս է, բայց «սափրվելու փրփուր, սարք, ատամի խոզանակ, մածուկ ԶՈւ-ն չի տալիս»:

«Օճառի տեխնիկական բնութագիրը բավականին լավն է: Անցած տարի բաժանեցինք քաղաքացիներին, և ոչ մի դժգոհություն չկար: Ամբողջ հարցն այն էր, որ պետք է լինի խանութից կամ հոտերով ու գունավոր: Իսկ մնացած հարցերով զինվորները ստանում են գումար, որոնցով գնում են իրենց հիգիենայի պարագաները, կամ ծնողներն են ուղարկում դրանք»,- հայտնեց ԳՇ պետը: