Այսօրվա ընտրությունների թիվ մեկ պատասխանատուն գործող իշխանությունը և իրավապահ մարմիններն են. Մարուքյան

«Լուսավոր Հայաստան» կուսակցության նախագահ Էդմոն Մարուքյանն Ազգային ժողովի արտահերթ ընտրություններում քվեարկել է Հայաստանի այն ներկայի համար, որը սկսվել է, և այն ապագայի համար, որի մասին խոսել են քարոզարշավի ընթացքում: Այս մասին նա հայտնեց լրագրողներին Երևանի 1/20 ընտրատեղամասում  քաղաքացիական պարտքը կատարելուց հետո: 

«Ուղերձս հետևյալն է` այսօր հնի և նորի կռվի ավարտն է: Քաղաքացիներին կոչ եմ անում ակտիվ գնալ ընտրատեղամասեր և իրենց քաղաքացիական պարտքը կատարել, չհանգստանալ, հանկարծ չկարծել, թե ամեն ինչ ավարտված է: Այսօր է ամեն ինչ ավարտվելու, և մինչև ժամը 8-ը քաղաքացիները ժամանակ ունեն այդ ամենն ավարտին հասցնելու»,- ասաց Մարուքյանը, որը քվեարկելու էր եկել որդու հետ:

Ըստ նրա՝ այսօրվա ընտրությունների թիվ մեկ պատասխանատուն գործող իշխանությունը և իրավապահ մարմիններն են: «Հույս ունեմ, որ բոլոր արատավոր երևույթները, որոնք եղել են, և որոնց մնացորդներն ու մնացուկները կփորձեն այսօր որևէ բան անել, կհայտնաբերվեն»,- նշեց «Լուսավոր Հայաստան» կուսակցության ղեկավարը: