«Իմ քայլը» դաշինքի քվեաթերթիկներ չեն եղել. «Անկախ դիտորդ»

«Անկախ դիտորդ» հասարակական դաշինքի 600 կարճաժամկետ դիտորդներ աշխատում են արագ արձագանքման 44 շրջիկ խմբերով՝ ընդհանուր առմամբ, 90 շրջիկ դիտորդով: 

Ըստ նրանց`ժամը 10:00-ի դրությամբ Գեղարքունիքի մարզի Սևան քաղաքի 20/05, Վանաձորի 23/54 և 23/53, Շիրակի մարզի Փանիկ գյուղի 33/20 տեղամասային ընտրական կենտրոնների մոտ քարոզչական պաստառներ են փակցված: 

Լոռու մարզի Լեռնանցք գյուղի 22/26 տեղամասային ընտրական կենտրոնում բացակայել են «Իմ քայլը» դաշինքի քվեաթերթիկները. մինչև տարածքային ընտրական հանձնաժողովից քվեաթերթիկների ստանալը քվեարկությունը դադարեցված է եղել: 

Կոտայքի մարզի Արգել գյուղի 27/33 տեղամասային ընտրական կենտրոնում քվեարկող զինծառայողները քվեաթերթիկներն ստանալուց հետո արդեն իսկ հերթի մեջ առանձնացրել են «Իմ քայլը» դաշինքի քվեաթերթիկը: «Անկախ դիտորդ» դաշինքի ներկայացուցիչները զգուշացրել են հանձնաժողովի նախագահին, որ հայտարարություն անի դրա մասին և կանխի մինչ քվեախցիկ մտնելը քվեաթերթիկների առանձնացումը: 

Երկու դեպքում դիտորդներին չեն թույլատրել լուսանկարել գրանցամատյանի` իրենց հետաքրքրող մասը, սակայն տարածքային ընտրական հանձնաժողով ահազանգելուց հետո խնդիրը վերացվել է: