Պետական միջոցներից 56 մլրդ դրամ ուղղվում է ֆոնդերի կառավարիչներին, որոնցից պետությունը հետո պարտքով գումար է վերցնում` պարտատոմսերով. Պարսյան

Դաշնակցությունն  արտահերթ ընտրություններին  գնում է նաև սոցիալ-տնտեսական` մյուսներից տարբերվող քաղաքականությամբ: Այս մասին «Տնտեսական քաղաքականություն և կոռուպցիայի դեմ պայքար. ընտրապայքարին մասնակցող ուժերի ծրագրային մոտեցումները» թեմայով քննարկման ժամանակ ասաց ՀՅԴ Բյուրոյի տնտեսական հետազոտությունների գրասենյակի պատասխանատու Սուրեն Պարսյանը՝ նշելով, որ ընտրաշրջանում շատերը տնտեսական քաղաքականության առումով դառնում են «սոցիալիստ»:

«Դաշնակցության տարբերությունն այն է, որ առաջնային է համարում  եկամուտների արդար բաշխումը, ինչպես նաև անվճար կրթությունը. կան հաշվարկներ, թե որքան գումար է անհրաժեշտ, մեծ գումարների մասին չէ խոսքը: Կարևորում ենք նաև անվճար բուժօգնությունը: Եթե այս խնդիրները չլուծենք, ապագայում կայուն աճ չենք ունենա»,- նշեց նա:

Անդրադառնալով  հարկային քաղաքականությանը` Պարսյանն ասաց, որ աշխարհում ընդունված է, որ նվազագույն աշխատավարձը չպետք է հարկել, բայց ՀՀ-ում որոշել են հենց առաջին դրամից հարկել բոլոր եկամուտները:

Քննարկմանը ներկա` «Իմ քայլը» դաշինքը ներկայացնող  Բաբկեն Թունյանն էլ նշեց, որ այսօր, ցավոք, հասարակությանը ծրագրային դրույթները չեն հետաքրքրում: Իսկ իրենք ձգտում են ներառական տնտեսության, երբ բոլոր շերտերը մասնակցություն են ունենում տնտեսական աճին:

«Լուսավոր Հայաստան» կուսակցության ներկայացուցիչ Արկադի Խաչատրյանը համաձայնեց Թունյանի հետ՝ մարդու որակի և կենսամակարդակի բարձրացման կարելի է հասնել ներառական տնտեսությամբ, բայց` ոչ միայն: Այստեղ նա անգամ բնապահպանական խնդիրներ առաջ քաշեց: 

ՀՅԴ ներկայացուցիչը ներածական ելույթներից հետո անդրադարձավ կուտակային կենսաթոշակային համակարգին` հիշեցնելով, որ «Ելք» դաշինքն իր նախընտրական ծրագրում ժամանակին խոստանում էր չեղարկել այս համակարգը, բայց այնուհետև տեղի ունեցավ վերանայում, որը ոչինչ չփոխեց, և մնացին նույն ռիսկերը: «Պետությունը չի երաշխավորում, որ մենք այդ գումարները ստանալու ենք ամբողջ ծավալով: Բացի այդ` պետական միջոցներից 56 մլրդ դրամ ուղղվում է ֆոնդերի կառավարիչներին, որոնցից պետությունը հետո պարտքով գումար է վերցնում` պարտատոմսերով»,- շեշտեց նա: