Խոսակցություն, որը տևեր այնքան, ինչ դրվել էր համացանցում, չի եղել. ՀՔԾ պետը՝ գաղտնալսման վերաբերյալ

Անկեղծ ասած՝ կան որոշ հանգամանքներ, որ այսօր էլ մեզ համար անհասկանալի են. լրագրողներին ասաց ՀՔԾ պետ Սասուն Խաչատրյանը իր և ԱԱԾ տնօրենի գաղտնալսման դեպքի մասին խոսելիս:

Նա հիշեցրեց, որ ԱԱԾ պետը հայտարարել էր, որ այդ խոսակցությունն իրականում մոնտաժված է: «Այնտեղ կան բառակապակցություններ, որոնք այդ ձևով չեն ասվել: Այս պահին այսքանն ասեմ, բայց հետագայում Քննչական կոմիտեն ավելի մանրամասն տեղեկություն կտա: Համենայն դեպս, այդպիսի խոսակցություն, որը տևեր այնքան, ինչ դրվել էր համացանցում, չի եղել, ինչն արդեն իսկ ապացուցվել է մեր վերծանումներով, որքանով տեղյակ եմ»,- ասաց Խաչատրյանը:

Անդրադառնալով Հրաչ-Վաչիկ անհասկանալի խառնաշփոթին, այսինքն՝ դատավորին, որի անունը շոշափվում է, Խաչատրյանը նշեց, որ դատավոր Հրաչ, որքանով տեղյակ է, չկա:

Դիտարկմանը, թե Վաչե Մարգարյանին են Հրաչ ասում, նա պատասխանեց, որ նման տեղեկություն չունի: «Հավանաբար, ՀՔԾ քննիչ Հրաչի մասին է խոսքը»,- նշեց նա:

ՀՔԾ պետի խոսքով՝ այդ գաղտնալսումն ուղղված էր իրենց դեմ, իրենց կառույցների գործունեության դեմ: Խաչատրյանը նշեց, որ դա իրենց լռեցնելու և զսպելու միջոց էր՝ դա անողների կարծիքով: