Ինչպես դու եկել ես, այդպես էլ կգնաս. Թևան Պողոսյան

Հայաստանյան ներքաղաքական վերջին շրջանի  զարգացումների, վարչապետի հրաժարականի եւ արտահերթ խորհրդարանական ընտրությունների մասին Yerkir.am-ը զրուցել է Մարդկային զարգացման միջազգային կենտրոնի նախագահ Թևան Պողոսյանի հետ:

- Սպասվում է, որ այսօր կամ վաղը վարչապետը հրաժարական կտա, և  ըստ այդմ` դեկտեմբերի 9-10-ը կլինեն արտահերթ ընտրություններ: Ի՞նչ քաղաքական զարգացումներ սպասել այս ընթացքում:

- Հոկտեմբերի 16-ին կլինի, թե` 18-ին, վստահ չեմ կարող ասել, բայց ծանոթ եմ վարչապետի` ֆրանսիական հեռուստաընկերությանը տված հարցազրույցին, և երբ կլինի, թող լինի:  Իսկ հրաժարական տալուց հետո եղող սխեման բոլորիս արդեն վաղուց հայտնի է. վարչապետը հրաժարական կտա, եթե 14 օրվա ընթացքում խորհրդարանը նոր վարչապետ չընտրի, ապա կլուծարվի: Իսկ քաղաքական զարգացումների հետ կապված հուսով եմ, որ ամեն ինչ իր հունով է գնալու, քանի որ կա ստորագրված հուշագիր, կան 16 հանրապետական պատգամավորներ, որոնք կողմ դիրքորոշում են արտահայտել, «Ելքը» ամբողջովին սատար է սրան, քաղաքական մյուս ուժերի հետ բանակցային գործընթաց կա, կողմերն էլ վստահեցնում են, որ վարչապետի թեկնածու չեն առաջադրի:Այնպես որ` հուսով եմ, որ ամեն բան խաղաղ կանցնի, և մենք երկու շաբաթ հետո կգնանք խորհրդարանական արտահերթ ընտրության:

- Պարո'ն Պողոսյան, Դուք  նաև նախագահի խորհրդականն եք:  Արմեն Սարգսյանն արդեն Հայաստանում է, եւ հետաքրքիր է, նա կստորագրի՞ հոկտեմբերի 2-ի` աղմուկ հանած օրինագիծը: Որեւէ տեղեկություն կարո՞ղ եք հայտնել մեզ այս մասով:

- Օրենքը նախատեսում է, որ ինչ-որ մի ժամանակահատվածում նախագահն իր վերաբերմունքը օրինագծի վերաբերյալ ասի: Գործընթաց կլինի, որից էլ պարզ կդառնա: Բայց եկեք դիտարկենք. օրենքը չկա, միևնույն է` քաղաքական ուժերը հայտարարում են, որ իրենք պատրաստ են դեկտեմբերին գնալ խորհրդարանական արտահերթ ընտրության և չեն պատրաստվում թեկնածու առաջադրել, ինչը նշանակում է, որ այլևս խնդիր չի լինելու` այս օրենքը կա, թե` ոչ: Հանրությունը ուժ չի կիրառելու, նիստը կայանալու է: Կամ` եթե դիտարկենք, որ այս օրենքը ստորագրվել է, նորից նույն իրավիճակն է: Այս օրենքի` լինել-չլինելու ֆունկցիան ավարտվել է նրանով, որ հուշագիր է ստորագրվել, ՀՀԿ-ն էլ հայտարարել է, որ թեկնածու չի պատրաստվում առաջադրել:

- Նախորդ իշխանությունների կարկառուն ներկայացուցիչ Գևորգ Կոստանյանը, ով դեռևս այս ապրիլին ասում էր, որ Նիկոլ Փաշինյանը պատրաստ չէ ստանձնել երկրի ղեկը, շատ դրական էր արտահայտվել վարչապետ Փաշինյանի մասին: Նաև ՀՀԿ-ական մի շարք պատգամավորներ կողմ են արտահայտվել խորհրդարանական արտահերթ ընտրությունները դեկտեմբերին անցկացնելու` վարչապետի առաջարկին: Ի՞նչ փոխվեց մի քանի օրում:

- Պետք է մի բան ասել. նրանց հաշվարկներում, ընկալումներում, դատողության մեջ կան ինչ-որ փոփոխություններ, որոնք ինձ համար ո´չ դատապարտելի են, ո´չ ողջունելի: Ես` ինքս, գիտակցում եմ, որ Հայաստանին պետք են արտահերթ ընտրություններ, սա մեր երկրի շահերից է բխում, և շատ ուրախ եմ, որ բանակցություններով նրանք կարողացան հասնել այս փոփոոխություններին: Մնացածի գնահատականները արդեն ապագայում կտան այն գործողությունները, որոնք կտեսնենք: Մեկը կմնա, կծառայի, միգուցե դա է փոփոխությունը, մյուսը կգնա ու բիզնեսով կզբաղվի` ասելով` վերջապես պրծա էս դարդ ու ցավից, սա իմը չէր: Միգուցե այսպես է, դժվարանում եմ ասել: Բայց կա որոշում, մեկնաբանություն, որն ընդունում եմ ի գիտություն: Մենք կարող ենք ապագայում ասել` այ, նայեք բանակցությունները խնդիր են կարողանում լուծել: Մենք ստեղծում ենք հաջողված փորձ:

- Արմեն  Աշոտյանը հանդես եկավ հայտարարությամբ, ըստ որի` դեկտեմբերին անցկացվելիք արտահերթ խորհրդարանական ընտրություններին կողմ արտահայտված ՀՀԿ-ական  պատգամավորիների վրա ճնշումներ են գործադրվել: Կարծում եք` իրո՞ք, եղել է նման բան, եւ ի՞նչ լծակներ կարող էին գործի դրվել, որոնք  հանրապետական պատգամավորներին կստիպեին կողմ լինել դեկտեմբերյան ընտրությանը:

 - Գործադիրը շատ լծակներ ունի: Խնդիրը այն է, թե վարչապետը կդիմե՞ր այդ լծակներին, թե՞ ոչ: Պարոն Աշոտյանին ճանաչելով` ասեմ, որ առանց որևէ տեղեկության նա այսպիսի հայտարարություն չէր անի: Տեղեկությունը գալիս է նրանից, որ ոչ թե նա այդ սենյակում է եղել ու տեսել է, թե ոնց են ճնշում պատգամավորներին, այլ նրան ինչ-որ մեկն ասել է: Հետաքրքիր է` նա, ով այդպիսի տեղեկատվություն է տվել պարոն Աշոտյանին, հիմա  կասի՞, որ այդպիսի ճնշումներ եղել են, թե՞ ոչ: Եթե բոլորը գալու են, ասեն, որ ճնշում չի եղել, դա իրենց սեփական որոշումն է, ինձ հետաքրքիր է, թե ո՞վ և ի՞նչ, ինչո՞ւ է հասցրել ականջին: Չէ՞ որ բամբասանքներն են մեզ միշտ խանգարողը եղել և անվստահության մթնոլորտ ստեղծել: Միգուցե մենք կարողանանք հասնել նրան, որ այս մշակույթը դադարի: Իսկ եթե նման բան չի եղել, որևէ մեկը նման բան չի ասել, և պարոն Աշոտյանն ինտրիգ է փորձում մտցնել, ուրեմն խնդիրն իր բաժնում կմնա: Բայց գուցեև մեկն իր արարքը այսպես է բացատրել: Այստեղ ճիշտ կլինի հասկանալ, թե ովքեր են այդ մարդիկ, և հասկանալ նրանց իսկական դեմքը:

- ՀՀԿ-ն նոր խորհրդարանում հայտնվելու շանսեր ունի՞:

- Վատ է, որ մենք խոսում ենք` ՀՀԿ-ն շանսեր կունենա՞, թե՞ ոչ: Ես երազում եմ այն երկրի մասին, որտեղ բոլորը, ովքեր քաղաքական ուժ են ու ունեն տեսլական, պատրաստ են թիմ ձևավորել և մասնակցել ընտրություններին,  շանս ունենան, շանս`մասնակցելու, հավասարը հավասարի պես ժամանակ ունենալու, իրենց տեսակետները, թիմին, մոտեցումները ներկայացնելու: Ինձ համար սա այլընտրանք է ներկայացնելու: Իսկ թե դրանից հետո ժողովուրդն ի՞նչ գնահատական կտա, եկեք այստեղ լռեմ: Բայց պետք է վստահ  լինենք, որ եթե մարդիկ իրենց ձայնը տան Հանրապետական կուսակցությանը, նրանց ձայները չեն գողացվելու, և այդ մարդիկ իրենց արդար, ազնիվ տոկոսն են ստանալու` անցողիկ, թե` ոչ: Եթե ես որևէ մեկի վրա պետք է նայեմ ու ասեմ` այ այս հայը պետք է այլևս գոյություն չունենա, դա ամենասխալ մոտեցումն է: Նրանք պետք է այս պրոցեսն անցնեն` ոնց են մեզ ներկայանալու, ինչով են մեզ ներկայանալու, բայց այն, որ նրանք էլ բոլոր ուժերի պես պետք է ունենան հնարավորություն, դա` հաստատ:

- Ըստ էության, բացի ՀՀԿ-ից, մնացած կուսակցությունները դեմ չէին, որ արտահերթ խորհրդարանական ընտրություններն անցկացվեն դեկտեմբերին: Մեր քաղաքական դաշտում ի՞նչն է կողմերին խանգարում միմյանց ավելի արագ և ճիշտ  հասկանալ:

- Մշակույթը: Քաղաքական մշակույթը: Այն, որ մենք շատ ժամանակ առաջնորդվում ենք միայն դիրքերով, այլ ոչ թե մեր  շահերով: Եթե մեր երկրի շահը մեր շահն է, ուրեմն պետք է հասկանալ` ում հետ ենք կառուցում մեր երկիրը: Պարզապես նոր քաղաքական մշակույթի մոտեցում պետք է ձևավորել և մեր տեսլականի մեջ առաջնորդվել շահերով: Ամեն ինչ պետք է միտված լինի մեր հայկական ընդհանուր շահի ձևավորմանը: Դրա համար երևի  պետք է վերագտնել, գիտակցել  մեր ինքնությունը: Մրցակցել` չի նշանակում պարտադիր խաբել:

- Այն, ինչ եղավ ապրիլին, արդյո՞ք նոր քաղաքական մշակույթի սկիզբը չէ:

-Սկիզբն է, բայց արդյո՞ք մենք դա անում ենք: Եթե ինձ հարցնեին, ես կասեի, որ իշխանությունները պետք է ավելի շուտ սկսեին  բանակցել: Բանակցեին հենց իրենց համար, որովհետև դա էր դառնալու հիմք` քաղաքական մշակույթ ձևավորելու այն օրը, երբ այսօրվա իշխանությունը, ի վերջո, գնալու էր և գալու էր հաջորդը: Ի վերջո, ինչպես դու եկել ես, այդպես էլ կգնաս:

Զրուցեց Ռոզա Խաչատրյանը