Փաշինյանը հրաժարական կտա վարչապետի պաշտոնից

Այսօր Գիտությունների ազգային ակադեմիայի մոտ հրավիրած հանրահավաքի ժամանակ վարչապետ Նիկոլ Փաշինյանը նշեց, որ արտահերթ ընտրությունները տեղի կունենան նոյեմբերի վերջին կամ դեկտեմբերի սկզբին: Ինչ վերաբերում է այսօր ԱԺ-ում ընդունված օրենքին, որը կարգավորում է ԱԺ նիստերի անցկացումը ֆորսմաժորային իրավիճակներում, նա ասաց, որ 21 օրվա ընթացքում ՀՀ նախագահն այն պետք է ստորագրի կամ դիմի ՍԴ` օրենքի սահմանադրականությունը վիճարկելու համար:

«Ես կդիմեմ ՀՀ նախագահին` կոչ անելով, որ նա չստորագրի այդ օրենքը»,- ասաց Փաշինյանը:

Իսկ երբ ՀՅԴ և ԲՀԿ նախարարների ու մարզպետների որոշումները դե յուրե մտնեն ուժի մեջ, դրանից հետո Փաշինյանը կտա հրաժարական վարչապետի պաշտոնից: «Հրաժարական կտամ, որ որևէ մեկը չմտածի, թե ես կառչած եմ վարչապետի պաշտոնից: 7 օրվա ընթացքում ԱԺ-ն պետք է ընտրի նոր վարչապետ, եթե այդ ընթացքում չընտրի նոր վարչապետ, ևս 7 օրվա ընթացքում պետք է ընտրի վարչապետ: Եթե ընտրվեց վարչապետը, ուրեմն ընտրվեց, իսկ եթե չընտրվեց վարչապետ, ուրեմն տեղի են ունենում արտահերթ խորհրդարանական ընտրություններ»,- ասաց նա` հավելելով, որ ժողովրդի հետ թույլ չեն տա ընտրել այլ վարչապետ:

Փաշինյանը հայտարարեց, որ ուղևորվում է ԱԺ` բանակցելու քաղաքական ուժերի հետ` ստեղծված իրավիճակը հանգուցալուծելու համար: