Նուբարաշենի աղբավայրը ոչ մի չափանիշի չի բավարարում, նոր աղբավայր կկառուցվի. Կամո Արեյան

Նուբարաշեն վարչական շրջանի բնակիչներն արդեն երկու օր է` բողոքի ակցիա են իրականացնում, փակում են ճանապարհը` պահանջելով լուծել Նուբարաշենի աղբանոցի խնդիրը։ Այսօր նուբարաշենցիներին է ընդունել Երևանի քաղաքապետի ժամանակավոր պաշտոնակատար Կամո Արեյանը:

Բնակիչներն Արեյանին ասացին, որ հաճելի չի եղել այսքան տարի տեսնել այդ աղբավայրը, իսկ հիմա իրենք 24 ժամ շնչում են գարշահոտ, հոտի հետ մեկտեղ` ծուխը: Նրանք առաջարկ արեցին, որ ինչ-որ աշխատանքներ տարվեն այդտեղ, աղբը փակվի, գոնե այդ օդը չշնչեն: «Հետագայում ակնկալում ենք նոր լուծումներ աղբանոցի փակման և նոր աղբանոցի կառուցման համար»,- ասաց բնակիչներից մեկը:

Արեյանն իր հերթին նշեց, որ, այո, Նուբարաշենի աղբավայրը չի բավարարում ոչ մի չափանիշի: «Այս աղբավայրը բոլոր տեսակետներից վտանգ է ներկայացնում, չի բավարարում բաց աղբավայրի չափանիշներին, բացի այդ` բնակավայրից դուրս չէ»,- ասաց նա և հավելեց, որ խնդիրը տարիներով է կուտակվել: «Այնպես չէ, որ ամեն ինչ արվել է 100%-ով: Այն` որպես աղբավայր, որևէ չափանիշի մեջ չի տեղավորվում, գոնե օպերատորն իր աշխատանքը եղածի համար օպերատիվ իրականացներ, վիճակն այսքան չէր սրվի»,- ասաց քաղաքապետի պաշտոնակատարը:

Արեյանը տեղեկացրեց, որ համաձայնագիր է կնքվել նոր աղբավայրի կառուցման մասին: «ՀՀ կառավարության և Եվրոպական վերակառուցման և զարգացման բանկի միջև կնքվել է վարկային համաձայնագիր, որ այդ նույն վայրին հարակից կառուցվի ժամանակակից քաղաքային աղբավայր, ծրագիրը վավերացվել է: Ընդամենը  օր առաջ ստացանք պատասխանը Եվրոպական վերակառուցման և զարգացման բանկից, որ հաստատվել է մրցութային փաթեթը, և մենք կարող ենք արդեն հայտարարել մրցույթը նոր աղբավայրի կառուցման համար։ Լինելու է ժամանակակից աղբավայր` պարսպապատված, լուսավորության համակարգով հագեցած, ընդունիչ կետով, պահակային ծառայությամբ, կշեռքով: Ամբողջ ստորգետնյա տարածքը դառնում է դրենաժային համակարգ, որպեսզի ջրերը չկուտակվեն, չաղտոտեն տարածքը, հոտի արտանետում չլինի: Բացի դրանից` ամբողջ հատակը ջրամեկուսացվում է՝ հողերը հետագա աղտոտումից փրկելու համար: Իսկ հիմա աղբավայրի ջրերը հոսում են մինչև Էրեբունի և լցվում ջրանցքը: Աղբավայրը պարտադիր ունենալու է  նաև ցողման և հողածածկման, աշխատանքներ: Յուրաքանչյուր ընդունումից հետո  աղբը պետք է տոփանվի, ցողվի ջրով, որպեսզի հոտի խնդիրը վերանա: 28 հա–ի վրա պետք է կառուցվի աղբավայրը: 1-2 տարվա ընթացքում կմեկնարկի ծրագիրը: Այսինքն՝ այս ամենն առնվազն 2 տարի կտևի»,- տեղեկացրեց նա:

Արեյանն ասաց, որ շատ շուտով կհայտարարվի մրցույթը, և խոստացավ, որ այժմ աղբավայրի վնասներն առավելագույնս մեղմելու նպատակով քայլեր կիրականացնեն: