Կենտրոնը բեռնաթափելու նպատակով երեք տրանսպորտային հանգույց կկառուցվի. Կամո Արեյան

Խորհրդարանում «Հայաստանի Հանրապետության 2016 թ. պետական բյուջեի կատարման մասին» հաշվետվության ժամանակ Երևանի քաղաքապետի առաջին տեղակալ Կամո Արեյանը նշեց, որ Երևանի կենտրոնը բեռնաթափելու նպատակով նախատեսվում է Գարեգին Նժդեհ և Արշակունյաց փողոցների տրանսպորտային հանգույցի ձևավորում: Ըստ նրա`երեք խոշոր հանգույցների կառուցման նախագծային փաթեթներ են ստեղծվում:

«Առաջինը Գարեգին Նժդեհ և Արշակունյաց փողոցների տրանսպորտային հանգույցի ձևավորումն է: Այստեղ առաջարկվում էր վերգետնյա ճանապարհի տարբերակ, մինչդեռ այն չի ընդունվել, քանի որ կխաթարեր քաղաքաշինական միջավայրը: Հիմա նոր տարբերակն է քննարկվում»,- նշեց Արեյանը:

Փոխքաղաքապետի խոսքով՝ երկրորդը Ագաթանգեղոս-Գրիգոր Լուսավորիչ-Արշակունյաց փողոցներին հարող ստորգետնյա տրանսպորտային հանգույցի ստեղծման ծրագիրն է, ինչը նպատակ ունի բեռնաթափել վերը նշված փողոցների ծանրաբեռնվածությունը: Երրորդ ծրագիրը, ըստ նրա, Իսակով-Լենինգրադյան նոր ճանապարհի կառուցման շարունակականությունն է:

«Իսակով պողոտայում՝ Երևանյան լճից վերև, կա նոր կառուցված կամուրջ: Ուղիղ հատելով Հրազդանի կիրճը`այն ներքևի հատվածով դուրս է գալիս Կոմիտասի անվան զբոսայգի և հատվում Արշակունյաց պողոտայի հետ»,- ասաց Արեյանը, ապա նշեց, որ ճանապարհաշինական աշխատանքները նախատեսվում է իրականացնել Ասիական զարգացման բանկի ֆինանսավորմամբ` մինչև 2022 թվականը: