Քաղաքապետը ոչնչից էլ չի խուսափում. Կամո Արեյան

Այսօր խորհրդարանում լրագրողները Երևանի քաղաքապետի առաջին տեղակալ Կամո Արեյանից հետաքրքվեցին՝ ինչո՞ւ Տարոն Մարգարյանը չէր ներկայացնում 2016 թվականի բյուջեի կատարողականի զեկույցը: «ԱԺ խորհրդի որոշմամբ հստակ գրված է, որ հրավիրվում է քաղաքապետի առաջին տեղակալը` որպես զեկուցող»,- պատասխանեց նա:

Դիտարկմանը՝ նախկինում էլ Տարոն Մարգարյանը չէր ներկայանում, արձագանքեց, որ ասել է` քաղաքապետը չներկայանալու որևէ պատճառ  չի ունեցել, բացակայությունները եղել են հարգելի, իսկ այս տարի հստակ ու սպառիչ պատասխան ունի:

Հարցին՝ Տարոն Մարգարյանը տեղեկացված չէ ամեն ինչից և չի կարող պատասխանել պատգամավորների հարցերին, այդ պատճառո՞վ չի գալիս,  Արեյանը պատասխանեց, որ քաղաքապետը տեղեկացված է ամեն ինչից, առավել քան` ինքը:

Հարցին էլ՝ գուցե բանավեճի՞ց է խուսափում, նա պատասխանեց, որ ոչնչից էլ չի խուսափում: