Կան ադրբեջանական զորքերի կուտակումներ, սակայն իրավիճակը աննախադեպ չէ. Փաշինյան

Այսօր ուշ երեկոյան ՀՀ վարչապետ Նիկոլ Փաշինյանը ֆեյսբուքյան ուղիղ միացմամբ պատասխանեց քաղաքացիների հարցերին: Հարցին, թե ինչ վիճակ է այս պահին ղարաբաղա-ադրբեջանական շփման գծում, և արդյո՞ք կա պատերազմի վտանգ, Փաշինյանը նախ արձանագրեց, որ վերջին մեկ, մեկ ու կես ամսվա մեջ, ըստ վիճակագրության, կրակոցների մակարդակը եղել է միջինից ցածր` վերջին տարիների համեմատությամբ: Չնայած դրան, ցավոք, վարչապետի խոսքով, եղան զոհեր:

«Կան ադրբեջանական զորքերի որոշակի կուտակումներ, դրանք երբեմն ծավալներով մեծանում են, բայց անընդհատ կա զորքերի շարժ: Նախիջևանի ուղղությամբ որոշակի լարվածություն է առաջացել»,- ասաց վարչապետը:

Ինչ վերաբերում է պատերազմի սկսման հավանականությանը, Փաշինյանը նշեց, որ ցանկացած պահի պետք է պատրաստ լինենք նման զարգացման:

«Չեմ կարող ասել, որ ունենք աննախադեպ իրավիճակ, ունենք սովորական ծանոթ իրավիճակ: Արձանագրենք, որ կոնֆլիկտը լուծված չէ, կիսապատերազմական վիճակ է,  որը ցանկացած պահին կարող է փոխվել: Դա չի նշանակում, որ պետք է շեղվենք բնականոն կյանքից: Չեմ ուզում ասել` անհանգստանալու կարիք կա, չեմ ուզում ասել` անհանգստանալու կարիք չկա, ամեն ինչ այնպես է ինչպես գիտենք: Աշխատում ենք ԶՈՒ-ում  մարտական ոգին ու պատրաստականությունը բարձրացնելու վրա: Աննախադեպ իրավիճակ չունենք, վիճակը աննախադեպ է` հարաբերական հանդարտության առումով»,- ասաց Փաշինյանը: