Սոչիում Փաշինյանը Պուտինին ինչ-որ նոր բան պետք է առաջարկի. ԵԱՏՄ ինստիտուտի տնօրեն

Սոչիում մայիսի 14-ին տեղի կունենա ԵԱՏՄ անդամ երկրների առաջնորդների գագաթաժողովը, որին կմասնակցի նաև Հայաստանի նորընտիր վարչապետ Նիկոլ Փաշինյանը: Չի բացառվում նրա հանդիպումը ՌԴ նախագահ Վլադիմիր Պուտինի հետ:

ԵԱՏՄ ինստիտուտի տնօրեն Վլադիմիր Լեպյոխինը Русарминфо-ի հետ զրույցում նշել է, որ Սոչիում նախատեսված գագաթաժողովը Հայաստանի նորընտիր վարչապետի համար հարմար առիթ կլինի, քանի որ այժմ նրա համար կարևոր է ցույց տալ, որ իր կուսակցության` իշխանության գալը վտանգ չի ներկայացնում հայ-ռուսական հարաբերությունների համար:

«Այլ բան է, որ Փաշինյանից պետք է սպասել որոշակի պայմանների առաջքաշում: Ի՞նչ պայմաններ նա կներկայացնի ԵԱՏՄ-ին, կտեսնենք: Նա իր հատուկ դիրքորոշումը ցույց կտա»,- ասել է Լեպյոխինը:

Ռուս փորձագետը նաև նշել է, որ եթե Հայաստանի նոր վարչապետն իսկապես հետաքրքրված է Ռուսաստանի հետ հարաբերությունների զարգացմամբ, ապա պետք է հանդես գա նորարարական առաջարկներով, որոնք չուներ Սերժ Սարգսյանը։