«Ոռոգվող գյուղատնտեսությունը Արարատի և Արմավիրի մարզերում» ծրագրի շրջանակում Հայաստանին կտրամադրվի 10 մլն եվրո դրամաշնորհ

Գյուղատնտեսության նախարարության, Գյուղատնտեսության զարգացման հիմնադրամի, մի շարք  ֆինանսական և միջազգային կառույցների ներկայացուցիչներ և ֆերմերներ Ֆրանսիական զարգացման գործակալության նախաձեռնությամբ մեկ հարկի տակ էին հավաքվել փորձի փոխանակման և  ագրոոլորտին առնչվող հարցերի քննարկման նպատակով:

 Հիմնադրամի գործադիր տնօրեն Գեղամ Գևորգյանը նշում է, որ աշխատաժողովի գլխավոր թեման վերաբերում է ֆինանսական ռեսուրսների հասանելիությանը. «Համադրում ենք պետության կողմից առաջարկվող մատչելի ֆինանսական ռեսուրսների հասանելիության ծրագրերը, դրան գումարում ենք նաև նոր դրամաշնորհային ծրագիրը, որ ԵՄ դրամական ռեսուրսներով  տրամադրվել է Հայաստանին Ֆրանսիական զարգացման գործակալության միջոցով»:

 Դրամաշնորհային՝ «Ոռոգվող գյուղատնտեսության զարգացումը ՀՀ Արարատի և Արմավիրի մարզերում» ծրագրի շրջանակում Հայաստանին տրամադրվում է 10 մլն եվրո: Գումարն ուղղվելու է  կաթիլային ոռոգման համակարգերի և  կարկտապաշտպան ցանցերի ներդրման, ինտենսիվ այգիների հիմնման, պտուղների վերամշակման ու հողերի կոնսոլիդացման ուղղությամբ կատարվող ծրագրերի իրագործմանը: Այս ծրագրի միջոցով Արարատի մարզում կառուցվող Վեդու  ջրամբարին հարակից համայնքների հողերը կխոշորացվեն և կաթիլային ոռոգման համակարգեր կներդրվեն:

 Հայաստանում Ֆրանսիայի արտակարգ և լիազոր դեսպան Ջոնաթան Լաքոտը նշել է, որ նմանօրինակ աշխատաժողովներն առավել կամրապնդեն երկրների միջև կապն ու ոլորտի տարբեր ներկայացուցիչների համար փորձի փոխանակման հարթակ կդառնան: