Ադրբեջանին զենք չի վաճառվի այն մասշտաբներով, ինչ 2016 թվականի ապրիլից առաջ էր. Կոնստանտին Կոսաչով

Ռուսաստանն իրականացնում է այն պայմանագրերը, որոնք կնքվել են մինչև 2016 թ. ապրիլը, և պարտավոր է դա անել այդ պայմանագրի կետերին համապատասխան. ԱԺ-ում լրագրողների հետ ճեպազրույցում ասաց  ՌԴ Դաշնային ժողովի Դաշնության խորհրդի միջազգային գործերի կոմիտեի նախագահ Կոնստանտին Կոսաչովը ՝ պատասխանելով հարցին` ինչո՞ւ է ՌԴ-ն դատապարտում ԱՄՆ-ին Ուկրաինային զենք վաճառելու համար՝ պնդելով, որ հակամարտող երկրին չի կարելի զենք վաճառել, մինչդեռ ինքը Ադրբեջանին 2011 թվականից մոտ 5 միլիարդի զենք է վաճառել:

Կոսաչովը նշեց, որ ուզում է ուշադրություն հրավիրել այն բանի վրա, որ Ուկրաինայում, մասնավորապես` հարավ-արևելքում իրավիճակն ավելի թեժ է, անընդհատ կրակոցներ են հնչում: «Բարեբախտաբար, ԼՂ կոնֆլիկտը, կարծում եմ, այդ վիճակում չէ: Բոլորս հասկանում ենք, որ իրավիճակը պայթյունավտանգ է, ու 2016 թվականի ապրիլի իրադարձությունները դրա ապացույցն էին: Այժմ Ռուսաստանն իրականացնում է այն պայմանագրերը, որոնք կնքվել են մինչև 2016 թվականի ապրիլը, և մենք պարտավոր ենք դա անել այդ պայմանագրի կետերին համապատասխան, բայց այն իրավիճակը, որը եղել է մինչև 2016 թ. ապրիլը, իմ ունեցած տեղեկություններով, հետագայում չի վերարտադրվելու այն մասշտաբներով, որոնցով իրականացվում էր մինչ այդ: Մենք արձագանքում ենք այն իրավիճակին, որը եղավ 2016 թվականի ապրիլին, դրանում ոչ մի կասկած չկա»,- ասաց նա: