ԼՂ հակամարտության գոտում խաղաղապահ գործողությունը ռուսական է, հնարավոր են Թուրքիայի հետ գործողությունները համակարգելու տարրեր միայն. Կոսաչով

Լեռնային Ղարաբաղի հակամարտության գոտում ռուս խաղաղապահների առաքելությունն արդյունավետ կլինի միայն այն դեպքում, երբ Հայաստանը, ինչպես Ադրբեջանը, ցույց տա իր պատրաստակամությունը կատարել պարտավորությունների իր մասը: Այդ մասին երեքշաբթի հայտարարել է Դաշնության խորհրդի միջազգային հարցերի հանձնաժողովի ղեկավար Կոնստանտին Կոսաչովը. տեղեկացնում է ՏԱՍՍ-ը:

«Կա Ադրբեջանի համաձայնությունը՝ կանգ առնել եղածի վրա և օգտագործել ռուս խաղաղապահների բարի ծառայությունները, կա համաձայնություն Հայաստանի, համենայն դեպս՝ Հայաստանի բարձրագույն ղեկավարության հետ: Այսօրվա դրությամբ մենք դեռ պետք է համոզվենք, որ այս համաձայնագիրն ուղեկցվում է գոնե հարաբերական հանրային համաձայնությամբ, հանրային կոնսենսուսով։ Հայաստանը պետք է ցույց տա, որ ինքը, ինչպես և Ադրբեջանը, պատրաստ է կատարել այս եռակողմ համաձայնագրով ստանձնած պարտավորության իր մասը, միայն այդ դեպքում արդյունավետ կլինեն ռուս խաղաղապահները»,- ասել է Կոսաչովը «Ռոսիա -24» հեռուստաալիքի եթերում:

«Լեռնային Ղարաբաղի հակամարտության գոտում խաղաղապահ գործողությունը ռուսական է, հնարավոր են Թուրքիայի հետ գործողությունները համակարգելու տարրեր միայն: Պարոն  Ալիևի հայտարարության մեջ մենք տեսանք Թուրքիային ուղղված որոշակի հաղորդագրություններ, որ դա համատեղ գործողություն է: Եկեք ուշադիր կարդանք ինչպես եռակողմ հայտարարությունը, այնպես էլ Ռուսաստանի Դաշնության նախագահի ներկայացրած տեքստը. խոսքը վերաբերում է հենց ռուսական խաղաղապահ զորակազմին»,- ասել է Կոսաչովը:

«Այո, հավանաբար, կողմերի գործողությունները համակարգելու որոշ տարրեր հնարավոր են: Չենք կարող անտեսել Թուրքիայի ներկայությունը Ադրբեջանում և Լեռնային Ղարաբաղում: Բայց կրկնում եմ՝ գործողությունը ռուսական է, գործողությունը խաղաղապահ է, գործողությունն իրականացվում է Հայաստանի և Ադրբեջանի համաձայնությամբ»,- ավելացրել է սենատորը: