Սերժ Սարգսյա՞ն, թե՞ Կարեն Կարապետյան. Ալիկ Սարգսյանը խուսափեց պատասխանել

Խորհրդարանում լրագրողների հետ զրույցում նախկին ոստիկանապետ, ներկայումս ՀՀԿ-ական պատգամավոր Ալիկ Սարգսյանը անդրադարձավ երեկ Եռաբլուրում Մանվել Գրիգորյանի արած հայտարարությանը:

Հիշեցնենք, որ ՀՀԿ-ական պատգամավոր Մանվել Գրիգորյանը Եռաբլուրում հայտարարել էր. «Կարեն Կարապետյանն ի՞նչ գիտի Արցախից: Կարող ա ապագայում Կարեն Կարապետյանը Սերժից էլ, Վազգենից էլ, Լևոնից էլ լավ իմանա, բայց էս պահին դուք ինձ անուն տվեք, չկա տենց մարդ: Եթե իմ կարծիքն ա` ինքն ա, վսյո»:

Ալիկ Սարգսյանի խոսքով` գեներալը Արցախի հետ կապված իր դիտարկումն է ներկայացրել: «Մանվել Գրիգորյանի կարծիքն է։ Ինքն ավելի լավ գիտի Արցախի պայքարը, ու լավ կլինի իրենից հարցնեք, թե ինչ է նկատի ունեցել։ Կարծում եմ՝ Արցախի մասին է ասել։ Դրանից դուրս չեմ կարծում, թե անձանց հետ կապված կարծիքներ է հայտնել», - նշեց նա։

Հարցին` անձամբ իր համար ով է ավելի նախընտրելի՝ Սերժ Սարգսյա՞նը, թե՞ Կարեն Կարապետյանը Սարգսյանն արձագանքեց. «Իզուր եք հարցն այդքան կոնկրետացնում։ Հիմա այդ հարցին չեմ էլ ուզում պատասխանել: Բնականաբար, իմ կարծիքն ունեմ, բայց օրը կգա, բոլորս էլ հնարավորություն կունենանք կարծիք հայտնելու»:

Նա հավելեց, որ գիտի` ով ավելի լավ, մեծ փորձ ունի, ով կարող է արտաքին աշխարհում ավելի պատշաճ կերպով Արցախյան խնդիրը ներկայացնել։