Կարո Փայլանը պատասխանել է թուրքական իշխանամետ թերթի մեղադրանքներին

Թուրքական «Akşam» իշխանամետ թերթը հունվարի 12-ի համարում «Պատրիարքարանում խափանվել է ԺԴԿ-ի խարդավանքը» հոդվածում մեղադրել էր Թուրքիայի մեջլիսի հայ պատգամավոր, քրդամետ Ժողովուրդների դեմոկրատական կուսակցության (HDP-ԺԴԿ) անդամ Կարո Փայլանին` ընտրությունները մանիպուլյացիայի ենթարկելու մեջ: Հոդվածում պնդում է արվել, թե ԺԴԿ-ն Փայլանի միջոցով ցանկանում է «իրենով անել» Կ.Պոլսի հայոց պատրիարքարանը և դրա գործունեությունը մոտեցնել հայկական սփյուռքի քաղաքական գծին: Իշխանական թերթը պնդել է նաև, որ Փայլանն իբրև թե աջակցում է պատրիարքի հավանական թեկնածու` Գուգարաց թեմի առաջնորդ Սեպուհ արքեպիսկոպոս Չուլջյանին, ով Սփյուռքի սիրելին է և Ցեղասպանության ճանաչման հարցի առաջամարտիկներից:

«ԺԴԿ-ի ստեղծման գործում մեծ դեր խաղացած Կարո Փայլանը և նրա թիմը ցանկացել են, ընտրությունները մանիպուլյացիայի ենթարկելով, ազդել դրանց վրա, քանի որ Փայլանի նպատակն է գործընթացն ուղղորդել այնպես, ինչպես Հայաստանն է ցանկանում»,- գրել է թերթը` ավելացնելով, որ Փայլանին չի հաջողվել իրականացնել իր մտադրությունը:

Ըստ Ermenihaber-ի՝ ի պատասխան թուրքական թերթի զրպարտիչ հոդվածի՝ Փայլանը գրավոր հայտարարություն է տարածել, որում մասնավորապես ասվում է.

«Մենք՝ Թուրքիայի հայ համայնքի ներկայացուցիչներս, երկար ժամանակ է, ինչ սպասում ենք պատրիարքի ընտրություններին: Դրա մասին ասվում է նաև թերթի հոդվածում: Խոչընդոտվող ընտրական գործընթացը ժամ առաջ սկսելու և կանոններին համապատասխան կազմակերպելու համար ես` որպես պատգամավոր, քայլեր եմ նախաձեռնել: Այդ թեմայով բազմիցս հանդիպել եմ կառավարության անդամների հետ: Թուրքիայի խորհրդարանում տարբեր առիթներով բազմաթիվ անգամ այս թեման օրակարգ եմ բերել: Որպես հայ համայնքի ներկայացուցիչ` պայքարել եմ պատրիարքական ընտրություններ անցկացնելու` մեր իրավունքի իրացման համար: Հակառակ այդ հոդվածում նշվածի՝ մինչ այս պահը պատրիարքի թեկնածուներից որևէ մեկին աջակցություն չեմ հայտնել: Համայնքի կողմից հարգանք վայելող, իր պարտականությունները կատարող ցանկացած թեկնածու ընդունելի է ինձ համար, իսկ թե ով կընտրվի պատրիարք, որոշում է հայ համայնքը»:

Հայ պատգամավորը նշել է, որ վերջին շրջանում թուրքական պետությունը դարձյալ սկսել է հայ համայնքի նկատմամբ կիրառել «հին ավանդույթները: «Դրսից ուղղորդվող համայնքի ներսի որոշ «համագործակցողներ», մեր արդար պահանջները մանիպուլյացիայի ենթարկելով, ցանկանում են շփոթության մեջ գցել կառավարությանն ու հասարակությանը»,- ասել է նա:

Փայլանը հայտարարությունն ավարտել է կոչով. «Դեմոկրատական կառույցներում սկսված ճգնաժամերը հաղթահարվում են ժողովրդավարական ընտրությունների միջոցով: Մենք` որպես հայ համայնք, հոգևոր և աշխարհիկ դաշտում այս քաոսին վերջ դնելու համար պետք է կենտրոնանաք օրենքով մեր իրավունքը հանդիսացող պատրիարքական ընտրությունների անցկացման վրա: Պետք է ունենանք լավ կառավարվող համայնք: Ես շարունակելու եմ բոլոր հարթակներից հայտարարել, որ դա բխում է նաև Թուրքիայի շահերից: Շարունակելու եմ այս ուղղությամբ ջանք գործադրել: Բոլոր պատկան մարմիններին, բացի իրենց անձնական շահերը հետապնդողներից, հրավիրում ենք միանալ այս ընդհանուր աշխատանքին»: