Բելգիայի արդարադատության նախարարը պատասխանել է Էրդողանի մեղադրանքներին

Բելգիայի արդարադատության նախարար Քոեն Գինսը պատասխանել է Թուրքիայի նախագահ Ռեջեփ Թայիփ Էրդողանի՝ Բելգիային ուղղված մեղադրանքներին, թե բելգիացիները «դեռ 2015 թվականին ազատ են արձակել Բրյուսելի ահաբեկչություններն իրականացրած եղբայրներից մեկին՝ Իբրահիմ էլ Բաքրաուիին»:

Ըստ Demokrathaber-ի՝ նախարարը բացառել է Բաքրաուիին ազատ արձակելու հարցում որևէ թերացումը՝ նշելով, որ այդ ժամանակահատվածում նա ահաբեկչության  հետ կապված որևէ հանցագործություն չի իրականացրել: «Որքան գիտեմ՝ էլ Բաքրաուին Թուրքիայից Հոլանդիա է արտաքսվել, ոչ թե Բելգիա»,- հավելել է Գինսը:

Հիշեցնենք, որ Էրդողանը Բելգիային մեղադրել էր դեռ 2015 թվականին Անկարայի նախազգուշացումներն անտեսելու մեջ: Նրա խոսքով՝ Բելգիան ազատ էր արձակել Թուրքիայում ձերբակալված ահաբեկչին, ով, իր իսկ ցանկությամբ, արտաքսվել էր երկրից: