Կարո Փայլանը պատասխանել է Թուրքիայի նախագահի մամուլի խոսնակի՝ Հայոց ցեղասպանության վերաբերյալ հայտարարությանը

Թուրքիայի մեջլիսի հայ պատգամավոր Կարո Փայլանը «Թվիթեր»-ի իր միկրոբլոգում պատասխանել է Հայոց ցեղասպանության մասին Ֆրանսիայի նախագահ Էմանուել Մակրոնի հայտարարությունը քննադատած՝ Թուրքիայի նախագահի մամուլի խոսնակ Իբրահիմ Քալընին:

«Արմենպրես»-ի փոխանցմամբ՝ Թուրքիայի նախագահի մամուլի խոսնակը, անդրադառնալով Մակրոնի հայտարարությանը, նշել էր, որ Հայոց ցեղասպանության մասին պնդումները քաղաքական սուտ են:

«Եթե Հայոց ցեղասպանությունը քաղաքական սուտ է, ապա ինչո՞ւ է Թուրքիայի նախագահ Ռեջեփ Թայիփ Էրդողանը 5 տարի շարունակ ապրիլի 24-ին հայ ժողովրդին ցավակցական ուղերձ հղում»,- գրել է Փայլանը:

Երկրորդ գրառմամբ հայ պատգամավորը հիշեցրել է, որ հայ ժողովուրդը 104 տարի է՝ սպասում է արդարության:

«Պետության որոշմամբ այս հողերից աքսորված և կոտորված հայ ժողովրդի մեծ ողբերգության հետ Թուրքիան չի առերեսվել և անվանում չի տվել... Տեղի ունեցածը նախ և առաջ Թուրքիայի մեջլիսի և նախագահի խնդիրը պետք է լինի, պետք է առերեսվել և անուն տալ տեղի ունեցածին... 104 տարի է սպասում ենք արդարության»,- նշված է Կարո Փայլանի հաղորդագրությունում: