Կարո Փայլանի պահվածքի պատճառով հայ համայնքն անհանգիստ է. Արամ Աթեշյան

Հայաստանում ինչպես ուզում եք, այնպես էլ խոսում եք՝ ազատ-ազատ, պետք է հաշվի առնել, որ Պոլսում այդպես չէ. լրագրողների հետ զրույցում ասաց Պոլսի Հայոց պատրիարքի նախկին փոխանորդ Արամ Աթեշյանը:

Նա նշեց, որ Թուրքիայում հայ պատգամավոր Կարո Փայլանի պահվածքի պատճառով հայ համայնքն անհանգիստ է: Ըստ Աթեշյանի  Փայլանն իր պահվածքով ու ելույթներով կարծես և' զարկում է, և' սիրում, ինչպես ինքը: «Թուրքիայում այդպես է, մենք պարտավոր ենք նման քայլեր անել: Այնպես չէ, որ ինչ ուզում, անում ենք»,- ասաց նա:

Հարցին` Աթեշյանի ներկայացմամբ ստացվում է՝ Փայլանի ընդդիմադիր պահվածքը վնասո՞ւմ է հայ համայնքին, սրբազանն ակնարկով պատասխանեց. «Եթե համայնքն անհանգիստ է, մեջտեղը մի բան կա»:

Մեկ այլ հարցի, թե ինչպե՞ս է վերաբերվում այն հանգամանքին, որ Փայլանը դիմել է Թուրքիայի ներքին գործերի նախարարություն՝ Պոլսի Հայոց պատրիարքությունում ընտրություններ անցկացնելու իրավունքի թույլտվության խնդրով, Աթեշյանը պատասխանեց, թե՝ Փայլանը թող սպասի, տեսնենք՝  կպատասխանե՞ն: «Սրանից 7-8 տարի առաջ էլ դիմել էին Թուրքիայի ՆԳՆ, բայց ոչ մի պատասխան»,- հավելեց նա: