Ասում են՝ Էրդողանի եղբայրն եմ, պատիվ է. Արամ Աթեշյան

Պոլսի Հայոց պատրիարքությունում տեղապահի ընտրություն այդպես էլ տեղի չի ունենում, պատճառն այն է, որ Թուրքիայի ղեկավարությունը չի ընդունում ներկայիս տեղապահի ժամանակավոր պաշտոնակատար Գարեգին արքեպիսկոպոս Բեքչյանին:  

Պոլսի Հայոց պատրիարքի նախկին փոխանորդ Արամ Աթեշյանը, ով Հայաստանում է, հանդիպեց լրագրողների հետ ու իր տեսակետը ներկայացրեց Պոլսում ստեղծված անորոշ իրավիճակի վերաբերյալ:

Ըստ նրա` ընտրություններ տեղի չեն ունենա այնքան ժամանակ, քանի դեռ նախկին վիճակին չի վերադառնա ամեն ինչ, ասել է, թե՝ ինքը կրկին կլինի փոխանորդի պաշտոնում, ընտրությունների կարգ մշակվի, որը կհաստատվի Թուրքիայի կառավարության կողմից, և հետո նոր ընտրություններ կանցկացվեն: Աթեշյանի խոսքով՝ սա է Թուրքիայի կառավարության պահանջը: «Թուրքիայի կառավարությունն ասում է, որ առանց իրենց հաշվի առնելու են ընտրություն կատարել ու Սահակ եպիսկոպոսին ժամանակավոր պաշտոնակատար կարգել, ուստի սա պետք է չեղյալ հայտարարել ու ամեն ինչ նախկին վիճակին բերել: Թուրքիայի կառավարությունն ասում է, որ իրենք ընտրություններին դեմ չեն»,- ասաց նա:

Աթեշյանի ներկայացմամբ՝ ընտրություններից 10 րոպե հետո Թուրքիայի կառավարությունից ֆաքսով նամակ է ստացել, որում նշված է եղել, որ ընտրություններ անցկացնելու կարիք չկա՝ ընդհանուր փոխանորդով պետք է շարունակենք մեր գործը: Սակայն, ըստ նրա, ընտրությունն արդեն կյանքի էր կոչված, և շատերն ուղղակի չլսեցին իրեն: «Այնպես է ստացվել, որ ֆաքսի ստացման ժամը 3 ժամ հետ էր ցույց տալիս, իբրև թե ես նախքան ընտրություններն եմ այն ստացել, սակայն ընդամենը ժամն է սխալ եղել: Ինձ շատ հարցերում են մեղադրում՝ չգնահատելով արածներս: Հայաստանյան մամուլն էլ անգամ գրեց, թե Աթեշյանը Էրդողանի եղբայրն է, ես էլ ասացի՝ այո, պատիվ է ինձ, որ երկրի նախագահի ու իշխանության հետ լավ եմ: Ոչ ոք արածներս չգնահատեց, իսկ ես հայ երեխաներին դպրոց եմ ուղարկել, Տիգրանակերտի եկեղեցին վերանորոգել, պատրիարքարանի նեղ փողոցի բոլոր խանութները փակել տվել ու ճանապարհը լայնացրել, Աղթամարի վրա խաչ տեղադրել…»,- նշեց Աթեշյանը:

Yerkir.am-ի դիտարկմանը, թե ինչպե՞ս է ստացվում, որ Աթեշյանը միայն բարին է գործում, իսկ հայ համայնքը չի ընդունում նրան, նա պատասխանեց՝ բոլոր հոգևորականներն ու համայնքը գնահատում են իր արածը, միայն օտարականները չեն ընդունում իրեն: «Այնպես չէ, որ բոլորը քննադատում են ինձ»,- հավելեց արքեպիսկոպոսը:

Այնուամենայնիվ, ի՞նչ հանգուցալուծում է տեսնում Աթեշյանը Պոլսի Հայոց պատրիարքի տեղապահի ընտրություն հարցում, Աթեշյանը պատասխանեց, որ պետք է Թուրքիայի կառավարության պահանջը կատարել: «Նրանց պահանջը հստակ է՝ գալ նախկին վիճակին ու նոր միայն ընտրություններ անցկացնել՝ իրենց կարգով: Հիմա հայ համայնքը երեք մասի է բաժանված՝ կեսն իմ կողմից է, մյուսները՝ Սահակ Մաշալյանի ու Գարեգին Բեքչյանի: Հայ համայնքը պառակտված է հիմա: Թուրքիայի կառավարությունն էլ պնդում է, թե առանց իրենց հարցնելու ենք ընտրություն անցկացրել, ինչի համար էլ հիմա թույլ չեն տալիս վերջնական ընտրություն անցկացնել»,- ասաց նա: