Զինված հարձակում՝ Կարո Փայլանի կուսակցության շենքի վրա

Թուրքիայում հայ պատգամավոր Կարո Փայլանի անդամակցած` Ժողովուրդների դեմոկրատական կուսակցության համանախագահների և պատգամավորների ձերբակալությունից հետո շարունակվում են այդ կուսակցության դեմ գործողությունները:

Ըստ Demokrathaber-ի՝ ատրճանակներով հարձակում է տեղի ունեցել կուսակցության` Իսքենդերուն շրջանի գրասենյակի վրա: Անհայտ անձինք կրակել են շենքի վրա, ինչի հետևանքով կոտրվել են գրասենյակի ապակիները:

Կուսակցականները զանգահարել են ոստիկանություն: Հետաքննություն է սկսվել:

Ըստ ANF-ի՝ կուսակցության այդ շրջանի նախագահ Ահմեդ Չահանը դատապարտել է զինված հարձակումը՝ պահանջելով անհապաղ գտնել դրա պատասխանատուներին: Նա հիշեցրել է նաև, որ կուսակցության շենքը նախկինում ևս նմանատիպ հարձակումների է ենթարկվել: