Կնոջն այլ տղամարդու հետ է տեսել, կոնյակի շիշը կոտրել գլխին

Աջափնյակ և Դավիթաշեն վարչական շրջանների դատախազությունը նույն շրջանների դատարան է ուղարկել դիտավորությամբ մեկ ուրիշի առողջությանը ծանր վնաս պատճառելու վերաբերյալ գործը:

Դատական տեղեկատվական համակարգում ներկայացված մեղադրական եզրակացության համաձայն՝ Մ. Մելքումյանն իր բնակարանում կնոջը տեսել է միայնակ իր ծանոթ և համագյուղացի Վ. Իսահակյանի հետ:

Համագյուղացու և իր կնոջ սիրային կապի կասկածանքի շուրջ վիճաբանել է Վ. Իսահակյանի հետ, որի ընթացքում ձեռքում գտնվող պայուսակից հանելով կոնյակով լի ապակյա տարան` մեկ անգամ հարվածել է Վ. Իսահակյանի գլխի գագաթային շրջանին, այնուհետև նշված տարայի կոտրված հատվածով մեկ անգամ որովայնի շրջանին` դիտավորությամբ Վ. Իսահակյանի առողջությանը պատճառելով ծանր վնաս` կյանքին վտանգ սպառնացող:

Կոնյակի շշի ապակիները Վ. Իսահակյանի գլխից հանվել են վիրահատական միջամտության արդյունքում:

Մ. Մելքումյանին մեղադրանք է առաջադրվել ՀՀ ՔՕ 112-րդ հոդվածի 1-ին մասի՝ դիտավորությամբ առողջությանը ծանր վնաս պատճառելու հատկանիշներով, և նրա նկատմամբ, որպես խափանման միջոց ընտրվել չհեռանալու մասին ստորագրությունը: