Եթե ԵԱՏՄ անդամ չլինեինք, ո՞ւր էինք արտահանելու մեր գյուղմթերքը. Սամվել Նիկոյան

Խորհրդարանում «Ելք»-ի նախաձեռնությամբ մեկնարկած` ԵԱՏՄ-ից դուրս գալու մասին լսումների ժամանակ ԱԺ ՀՀԿ-ական պատգամավոր Սամվել Նիկոյանն ասաց, որ, չնայած այն հանգամանքին, որ ՌԴ-ն զենք է վաճառում Ադրբեջանին, ինչն անընդունելի է, Հայաստանը ՌԴ-ի հետ կնքած համաձայնագրերով ավելի էժան գնով է զենք ձեռք բերում:

«ՌԴ-ն զենք է վաճառում Ադրբեջանին, ինչը շատ վատ է, բայց մենք մեր ազգային անվտանգությունը կարողանում ենք ապահովել՝ ձեռք բերելով զինատեսակներ շատ ավելի էժան գներով: Այդ առումով այսօր ՀԱՊԿ-ին մեր անդամագրումը արդյունավետ է», - ընդգծեց պատգամավորը:

Նա նշեց, որ միությունում կան բազմաթիվ խնդիրներ, որոնք պետք է լուծել, սակայն ԵԱՏՄ-ն նոր հնարավորություն է Հայաստանի համար: «Պատկերացրեք, որ ԵԱՏՄ անդամ չէինք, ՌԴ-ի հետ չէինք կարող ունենալ տնտեսական հարաբերություններ, ո՞ւր էր արտահանվելու գյուղմթերքը»,- ասաց նա:

Խոսելով նոյեմբերի 24-ին Բրյուսելում ստորագրված ՀՀ-ԵՄ նոր համաձայնագրի մասին՝ Նիկոյանն ընդգծեց, որ դա ՀՀ արտաքին քաղաքականության հաղթանակն էր: «Հայաստանը ցույց տվեց, որ ինքնիշխան պետություն է ու ինքն է կառուցում իր արտաքին հարաբերությունները»,- ասաց նա: